پوسته بایرام عرفه‌‌سینده 400 مین تومنه چاتدی
ایرانین ایستاتیستیکا مرکزی‌نین سون راپورونا گؤره، بهمن آییندا جویز ایچی، پوسته و بادامین قیمتی اؤتن ایلله موقایسهده یوزده ۱۷ ایله ۴۰ آرتیب و پوسته‌نین کیلوسو ۴۰۰ مین تومن سرحدینه چاتیب.
ایرانین ایستاتیستیکا مرکزی‌نین راپورونا اساساً، بهمن آییندا ارزاق محصوللاری‌نین اورتالاما قیمتی اوندان عبارتدیر کی، پوسته‌نین هر کیلوگرامی‌نین اورتالاما قیمتی کئچن ایلین بهمنینده ۲۲۷ مین تومندن بو ایلین بهمنینده ۳۱۸ مین تومنه چاتیب و هر کیلوگرامی بعضا ۳۹۰ مین تومندن چوخ قیتمته ساتیلیر. بو محصول بو ایلین آذر آیی ایله موقایسهده ۲.۶ و کئچن ایلین بهمن آیی ایله موقایسهده ایسه یوزده ۳۹.۸ باهالاشیب.
اؤتن ایلین بهمن آییندا اورتالاما ۲۵۷ مین تومن اولان جویز ایچی‌نین قیمتی بو ایلین عینی آییندا ۳۰۰ مین تومنه یوکسه‌لیب، حتی ۳۳۵ مین تومندن یوخاری قیمته چاتیب. جویز ایچی بو ایلین آذر آیی ایله موقایسهده ۱.۳ فایز، اؤتن ایلین بهمنی ایله موقایسهده ایسه یوزده ۱۷.۱ باهالاشیب.
اؤتن ایلین بهمن آییندا اورتالاما ۳۰۰ مین تومن اولان بادامین قیمتی بو ایلین عینی آییندا ۳۶۰ مین تومنه یوکسه‌لیب. بادام قیمتی کئچن ایل ۲۹۵ مین تومندیر و بو ایلین آذر آیی ایله موقایسهده ۲.۱ فایز، اؤتن ایلین بهمنی ایله موقایسهده ایسه یوزده ۲۴.۶ باهالاشیب.
راپوردا بو محصوللارین ایخراج ایستاتیستیکاسینا دا ایستیناد ائدیلیر و بیلدیریلیر کی، بو ایلین ۱۰ آییندا ۲۷۴۸ تون ۲۳.۲ میلیون دوللاردان چوخ بادام، ۴۲۶ تون ۲.۵ میلیون دوللاردان چوخ جویز، ۱۰۳.۳ مین تون ۶۲۱.۵ میلیون دوللاردان چوخ قابیقلی پوسته، ۱۵.۳ مین تون ۱۷۰.۷ میلیون دوللاردان چوخ پوسته ایچی و ۵.۱ میلیون دوللاردان چوخ ديرینده ۶۴۷ تون باشقا پوسته ایخراج ائدیلیب.
