پرستو فریدی گوونلیک گوجلری طرفیندن تبریزده حبس ائدیلیب
تبریز بیلیم‌یوردونون صنایع موهندیسلیگی فاکولته‌سی‌نین اؤیرنجیسی پرستو فریدی ۱۳ آبان ۱۴۰۲-ده سحر ساعتلاریندا تبریزده آتاسی‌نین ائوینده گوونلیک گوجلری طرفیندن حبس ائدیلیب.
بو واختا کیمی بو آذربایجانلی اؤیرنجی‌نین حبسی‌نین سببلری، مومکون اتهامین آدی و کؤچورولمه یئری باره‌ده آیرینتیلی بیلگی یوخدور.
اونون حبسی زامانی گوونلیک امکداشلاری اونون بعضی شخصی اشیالارینی، او جومله‌‌‌دن موبیل تلفونو، لپ تاپ، فلش دیسکی و … موصادیره ائدیبلر.
ایسلام جمهورییتی‌نین گوونلیک گوجلری‌نین اؤیرنجیلره تضییقلری اؤتن هفته‌لرده ده داوام ائدیب و ایرانین چئشیدلی بیلیم‌یوردلاریندا اعتراض ائدن اؤیرنجیلرین حبسی و فعالیتی‌نین دایاندیریلماسی خبرلری یاییلیب.
بو ایل ۹ آباندا حبس اولونانلارین دورومونو تعقیب ائدن کومیته اؤیرنجی فعال نیلوفر میرزایی‌نین حبس اولوندوغونو اعلان ائدیب و اونون ۷ آبان گونو آرمیتا گراوندین دفن مراسیمینده حبس ائدیلدیگینی یازیب.
جوما آخشامی، ۱۱ آباندا ، اؤیرنجی بیرلیگی شورالاری بیر راپوروندا، تهران بیلیم‌یوردونون کامپوسلارینا حجاب قورویوجو قوه‌لرین یئر‌لشدیریلمه‌سی‌نین گئنیشلندیریلمه‌سینی اعلان ائتدی و آرتیردی کی، حجاب قورویوجو قوه‌لری ایله عینی واختدا بو بیلیم‌یوردونون مرکزی کامپوسوندا و باشقا کامپوسلاردا دئوریه‌لر حیاتا کئچیریلیر، بیر هفته ایچینده ۵۰-دن چوخ اؤیرنجی قیز “حجابسیز اولدوقلارینی بهانه ائده‌رک اینتیظام کومیته‌سینه چاغیریلیب و توبیخدن توتموش تحصیلدن اوزاقلاشدیریلماغا قدر چئشیدلی جزالار آلیبلار”.
