پانته‌آ بهرامین حجابسیز گزمه‌سی‌نین یاراتدیغی قاریشیقلیق داوام ائدیر؛ لوتوس سینماسی‌نین مودیری ایشدن چیخاریلیب
ایران خبر آژانسلاری‌نین وئردیگی بیلگیلره گؤره، اویونچو پانته‌آ بهرام لوتوس سینمادا کئچیریلن «آسلان دریسی» سریالی‌نین اکرانیندا حجابسیز گؤرونمه‌سیندن بیر گون سونرا بو سینمانین مودیری ایشدن چیخاریلیب.
مهر دؤولت خبر آژانسی‌نین وئردیگی بیلگیلره گؤره، لوتوس سینماسی‌نین مودیری بو اویونچونون مجبوری حجابا عمل ائتمه‌مه‌سی سببیندن ایشدن چیخاریلیب.
چارشنبه گونو پانته‌آ بهرام “آسلان دریسی” سریالی‌نین “لوتوس سینما”دا کئچیریلن آچیلیشیندا مجبوری حجابسیز قاتیلیب. اونون شکیللری سوسیال شبکه قوللانیجیلاری طرفیندن بؤیوک ماراقلا قارشیلانیب.
بو حادثه‌‌‌دن سونرا سینما تشکیلاتی‌نین مونیتورینق و دیرلندیرمه اوذره معاونی دئییب: آسلان دریسی سریالی‌نین فینالندا یارانان قالماقاللاردان سونرا لوتوس سینماسی‌نین مودیری ایشدن چیخاریلیب.
سون هفته‌لرده قادینلارین سیویل موباریزه‌لری داها گئنیش شکیلده ایزله‌نیلیب و ایران ایسلام جمهورییتی‌نین چئشیدلی قوروملارلا مجبوری حجاب قانونونو داوام ائتدیرمه‌یه چالیشیب. ایران قادین اویونچولاری، قادین، یاشام و آزادلیق اینقیلابیندا آپاریجی قروپلاردان بیری اولوب و حتی حؤکومت اونلارین بعضیلرینی مجبوری حجابا رعایت ائتمه‌دیکلرینه گؤره حبس ائدیب.
