واثقی قارداشلار بئش ایل تعزیری حبس جزاسینا محکوم ائدیلدیلر
ایکی قارداش و تورک مدنی فعالی اولان علی و رضا واثقی، سیرایلا ۳ و ۲ ایل تعزیری حبس جزاسینا محکوم ائدیلدیلر.
اردبیل اینقیلاب محکمه‌‌سی‌نین ۱-جی شؤبه‌سی، حاکم مهدوی‌راد ریاستی ایله بو حؤکمو چیخاردی.
بو ایکی قارداش «گئجه بیلدیریسی (شبنامه) چاپ ائتمکله اؤلکه‌نین میلی تهلوکه‌‌‌سیزلیگینه قارشی جینایت تؤرتمکده ایشتیراک گیریشیمی و رژیمین علیهینه تبلیغات ایشلری‌نین آپاریلماسی ایله اتهام اولونورلار.»
واثقی عائله‌‌‌سی‌نین بیر قوهومونون سؤزلرینه گؤره، بو حؤکم ۲۸ مرداد ۱۳۹۹-دا بو ایکی قارداشا شیفاهی شکیلده چاتدیریلیب.
بو حؤکم اطلاعات ایداره‌سی‌نین راپورو اساسیندا و بو ایکی مدنی فعالین ادعا ائدیلن گئجه بیلدیری‌لریندن خبرسیز اولدوقلارینی حالدا وئریلیب.
بو ایکی قارداش، سربست بوراخیلدیقدان سونرا تهلوکه‌‌‌سیزلیک قوه‌لری طرفیندن دؤیولدوکلرینی و بدنلرینده‌کی دؤیولمه ایزلرینی سوسیال شبکلرده یایدیقلاری اوچون ده گوناهلاندیریلیرلار.
علی و رضا واثقی ۲۲ خرداد چارشنبه آخشامی ایش یئرلرینده دؤیوله‌رک توتوقلاندیلار و ۲۷ خرداددا محکمه‌‌نین سونونا قدر گیروو موقابیلینده سربست بوراخیلدیلار.
بو فعاللارین ایش یئری ۲۲ خرداد جوما آخشامی اطلاعات ایداره‌سی‌نین مامورلاری طرفیندن یوخلانیلیب. بو یوخلاما زامانی اونلارین بیر سیرا شخصی اشیالاری و کامپیوترلری موصادیره ائدیلیب.
