هم‌میهن قزئتی: افقانلار ایراندا قالماق اوچون ۱۰۰ میلیون تومن خرجله‌مه‌لیدیرلر
افقان موهاجیرلرین ایراندان قووولماسی سورجی‌نین گوجلندیگی بیر شرایطده “هم‌میهن” قزئتی افقان موهاجیردن آلینتی گتیره‌رک یازیب کی، افقان موهاجیرلر ایراندا قالماق اوچون “عاغیللی کارت” آلمالیدیرلار کی، بو دا “۱۰۰ میلیون تومن”دیر.
“هم‌میهن” قزئتی آلتی ایل اؤنجه حیات یولداشی ایله بیرلیکده ایرانا گلن افقان قادین عاریفه‌دن آلینتی گتیره‌رک، ایکی نفرین سونونجو دفعه پاسپورت یئنیله‌مه‌سی اوچون موراجعت ائتدیکلری زامان اونلارا عاغیللی کارت آلمالاری لازیم اولدوغونو سؤیله‌دیگینی یازیب: “عاغیللی کارتین قیمتی ۱۰۰ میلیون تومندیر”.
بو راپورا گؤره، اؤتن ایلین خرداد آییندا عاغیللی کارتین وئریلمه‌سینه دایر امر وئریلیب و افقان موهاجیرلر شرطلره جاواب وئررسه، ایراندا قالماق اوچون بو کیملیک کارتینی آلا بیلرلر کی، بو دا میلّی کارتا بنزه‌ییر و قئیری-ایرانلیلارا وئریلیر.
عاغیللی کارتلار ایران ایسلام جمهورییتی‌نین خاریجی ایشلر ناظرلیگی و کؤچ ایداره‌سی واسطه‌‌‌سیله وئریلیر.
هم‌میهن قزئتی‌نین یازدیغینا گؤره، بئله کارتلارین وئریلمه‌سی “۱۰۰ میلیون تومنلیک یاتیریم پلانی” کیمی تانینیر.
بو یایدان اعتباراً افقان موهاجیرلرین ایخراج ائدیلمه سورجی شدتله‌نیب.
اؤتن ایل ۲۲ مهر آییندا ۵۴۰ صنعتچی، حوقوقچو، حکیم، ژورنالیست، وطنداش و مدنی فعال ایراندا افقان موهاجیرلره قارشی تعقیبلرین دایاندیریلماسینی طلب ائدیب.
