هرانا خبر آژانسی: روح‌الله زم اعدام ائدیلرکن قورو آجلیق آکسییاسی کئچیریردی
هرانا اینسان حوقوقلاری سایتی بیر راپوردا کرجده‌کی رجایی‌شهر حبس‌خاناسیندا “روح‌الله زم”ین اعدامی‌نین آیرینتیلارینی یاییملادی و بو ژورنالیستین اعدام زمانی آجلیق آکسییاسی کئچیردیگینی بیلدیردی.
هرانا، “روح‌الله زم”ین کرجده‌کی رجایی‌شهر حبس‌خاناسینا کؤچورولمه‌سیندن اعدامینا قدر آجلیق آکسییاسی کئچیردیگینی یازیر.
بو معلوماتا گؤره، زم، ۲۰ آذر جوما آخشامی گونو اینقیلاب کئشیکچیلری تجرید‌خاناسیندان اینقیلاب کئشیکچیلری بندی اولاراق بیلینن کرجده‌کی رجایی‌شهر حبس‌خاناسی‌نین ۸-جی بندینه کؤچورولدو.
او جوما آخشامی اوین حبس‌خاناسینا کؤچورولدو و عائله‌‌‌سی ایله سون زیارتیندن سونرا رجایی شهر حبس‌خاناسینا قاییتدی.
هرانایا گؤره، اعدام ائدیلرکن بیر سیرا گوونلیک گوجلری، او جومله‌‌‌دن ثارالله قرارگاهی‌نین بو یاخینلاردا تثبیت اولونان رئوف آدلی سورغوچو و ساوجیلیغین نوماینده‌‌سی و سیاسی محبوسلاردان مسوول ساوجی یاردیمجیسی امین وزیری ده ایشتیراک ائدیردی.
هرانا، زم‌ین جسدی‌نین اعدام ائدیلدیکدن سونرا تخمیناً ۲۰ دقیقه داردا ساخلانیلدیغینی و نهایت، اعدام یئرینه گئج گلن کرج پولیس رییسی ده داخیل اولماقلا بعضی موحافیظه اورقانلاری‌نین ایشچیلری‌نین ایشتیراکی ایله یئره ائندیریلدیگینی یازدی.
بو گون روح‌الله زم‌ین آتاسی محمدعلی زم‌ین ده ۲۱ آذر جوما آخشامی قدر بو ژورنالیستین اعدام امریندن خبردار اولمادیغینی آچیقلادی.
محمدعلی زم شخصی اینستاگرام صفحه‌‌‌سینده اوغلو ایله سون گؤروش زامانی گوونلیک گوجلری‌نین روح‌الله-ین اعدام حؤکمونون تصدیقینی گیزلی ساخلاماغا چالیشدیغینی و اؤلوم حؤکمونون تصدیقلنمه‌سی باره‌ده اوغلونا معلومات وئرمه‌مه‌سینی خواهش ائتدیگینی یازدی.
فرانسادا یاشایان بیر ژورنالیست روح‌الله زم، ۱۴ آی اؤنجه اینقیلاب کئشیکچیلری طرفیندن عراقا سفری زامانی قاچیریلمیش و موحاریبه اتهامی ایله ایسلام جمهوریییتی محکمه‌‌سی طرفیندن اعداما محکوم ائدیلمیشدیر.
بو ژورنالیستین اعدام حؤکمو ۲۲ آذر ۱۳۹۹-جو ایل شنبه گونو سحر کرجده‌کی رجایی‌شهر حبس‌خاناسیندا حیاتا کئچیریلدی.
