هادی قلیزاده تبریزده علی جنگجو خالط آبادی‌نین دفن مراسیمینده حبس ائدیلیب
ایران‌وایره چاتان خبره گؤره هادی قلیزاده بو گون، ۱۶ آذر ۱۴۰۲-ده اوستاد علی جنگجو خالط آبادی‌نین دفن مراسیمی زامانی تبریزین وادی رحمت قبیریستانلیغیندا حبس ائدیلیب.
بو واختا قدر جناب قلیزاده‌نین حبسی‌نین سببلری، کؤچورولمه یئری و دورومو باره‌ده آیرینتیلی بیلگی یوخدور.
بو آذربایجانلی فعال بوندان اؤنجه اورمیه گؤلونون کریتیک دورومونا توپلومون دقتینی جلب ائتمک مقصدیله بئل چانتاسینا “اؤزوموز اوچون/گؤلوموز اوچون” یازیسی اولان پانکارتی آساراق تبریزدن اورمیه گؤلونه یوروشه چیخیب و بو حرکتدن سونرا اطلاعات ایداره‌سی طرفیندن تهدید ائدیلدی.
آذربایجانلی فعاللار فرقلی بهانه‌لر ایله گوونلیک گوجلری طرفیندن ساخلانیلیب، فیزیکی و روحی ایشگنجه‌لره معروض قالیب و حتی عائله عضولری ده اطلاعات مامورلاری و محکمه اورقانلاری طرفیندن دفعه‌لر ایله تهدید ائدیلیبلر.
