هادی‌شهر-قاراچای یولوندا اؤلومله سونوجلانان یول قضاسی
دوغو آذربایجان ایالتی اورژانسی‌نین سؤزچوسو بیلدیریب: هادی‌شهر-قاراچای یولوندا باش وئرن یول قضاسیندا ۱ نفر حیاتینی ایتیریب و ۵ نفر ده یارالانیب.
وحید شادی‌نیا ژورنالیستلره وئردیگی موصاحیبه‌ده دئییب: ۱۸ مرداد ۱۴۰۲-ده خشام ساعتلرینده پرشیا مارکالی اتومبیل قایایا ديیب و اورژانس ایشچیلری قضا یئرینه گؤندریلیب.
او دئییب: آلینان بیلگیلره گؤره، ۴۰ یاشلی بیر ارکک آلدیغی یارالار سونوجوندا دونیاسینی ديَیشیب و ۵ یارالی تعجیل یاردیم تدبیرلرله هادی‌شهرین دوکتور ساجدی خسته‌خاناسینا یئر‌لشدیریلیب.
آذربایجانین یوللاری سون دؤنملرده قضالارین ان چوخ یاشاندیغی و اؤلوملر ایله سونوجلانان یئرلردن بیریدیر.
بو بؤلگه‌نین اوروپایا ترانزیت یولو اولماسینا باخمایاراق یوللاردا بیر یاتیریمین اولماماسیندان سورکلی یول قضالاری گؤرونور.
