نیویورک تایمز: بایدن، نتانیاهونو ایرانا درحال جاواب وئرمکدن چکیندیردی
“نیویورک تایمز” قزئتی یازیب کی، آمریکا جمهورباشقانی جو بایدن بنیامین نتانیاهونو ایرانین اینسانسیز هاوا آراجی و راکئت هوجوملارینا درحال جاواب وئرمکدن چکیندیریب.
نیویورک تایمز قزئتی‌نین یازدیغینا گؤره، ۲۶ فروردین بازار گونو سحر ساعتلاریندا بایدن ایله ۲۵ دقیقه‌لیک صؤحبتدن سونرا نتانیاهو ایرانا درحال هوجوم اوچون یاشیل ایشیق یاندیرماقدان واز کئچیب.
بو راپورا گؤره، اسرائیلین دؤیوش کابینه‌سی‌نین بیر نئچه عضوو ایرانا درحال هوجومون طرفداری ایدی، لاکین ایراندان جدی زیانین اولماماسی، ائله‌جه ده نتانیاهونون بایدن ایله صؤحبتی بو هوجومون لغوینه سبب اولوب.
بونونلا بئله، اسرائیل یئتکیلیسی سی‌ان‌ان ایله دانیشیغیندا دئییب کی، اسرائیل ایران ایسلام جمهورییتی‌نین حربی هوجومونا جاواب وئره‌جک، لاکین بو جاوابین احاطه دایره‌سی هله بللی ائدیلمه‌ییب.
بو اسرائیللی یئتکیلی آرتیریب کی، اؤلکه‌سی بوتون قایدالاری پوزماغی (گؤزله‌نیلمز بیر شئی ائتمک معناسیندا) و یا دقیق جاواب تطبیق ائتمیی هله بللی ائتمه‌ییب.
اونون سؤزلرینه گؤره، بو واریانتلار اسرائیلین حربی کابینه‌سی‌نین بازار گونو کئچیریله‌جک ایجلاسیندا آیرینتیلی موذاکیره اولوناجاق.
اسرائیل خاریجی ایشلر ناظرلیگی ده آرتیریب کی، ایسلام جمهورییتی‌نین بو اؤلکه‌یه هوجومو بیر داها ثبوت ائدیر کی، بؤلگه‌ده‌کی تررور عملیاتلاری‌نین آرخاسیندا ایران دایانیر.
او آرتیریب کی، بو سببدن ایران هئچ واخت نووه سلاحینا مالیک اولمامالیدیر و ایسلام جمهورییتی سالدیریسی‌نین عوضینی اؤده‌مه‌لیدیر.
اسرائیلی ایرانین دمشقده‌کی کونسوللوغونا هوجوما جاواب وئرمکله تهدید ائدن آردیجیل گونلردن سونرا ایسلام جمهورییتی نهایت، بازار گونو، ۲۶ فروردین سحر ساعتلاریندا یوزلرله راکئت و اینسانسیز هاوا آراجی ایله اسرائیله هوجوم ائتدی.
اسرائیل اوردوسونون سؤزچوسو “دانیل هاگاری” ده بو هوجوملا باغلی یئنیلنمه‌سینده ایران حؤکومتی‌نین اسرائیله آتدیغی ۳۰۰ تهدیدین یوزده ۹۹-نون بو اؤلکه‌نین هاوا ساوونماسی طرفیندن محو ائدیلدیگینی آچیقلاییب.
هاگاری آتیلان ۱۷۰ اینسانسیز هاوا آراجیندان هئچ بیری‌نین اسرائیلین هاوا مکانینا داخیل اولمادیغینی و هامیسی‌نین اؤلکه سرحدلری خاریجینده اسرائیل و موتفیقلری طرفیندن وورولدوغونو بیلدیریب.
