نوید افکاری عادل‌آباد حبسخاناسینین اعدام بندینه کؤچورولدو
نوید افکاری عادل‌آباد حبسخاناسینین عیبرت بندینه کؤچورولدو. بو خبری ایران‌وایره آچیقلایان معلوماتلی بیر منبع دئییر: «عیبرت بندینده گؤروشمه، تلفون و هر شئیه اریشیم کسیلیب. اورادا اعدام ایجراسی اولان اون نفری ساخلاییرلار.»
ایرانلی گولشچی نوید افکاری، شیراز سو ایداره‌سی‌نین بیر چالیشانی حسن ترکمانین قتلی و ۱۳۹۷-جی ایلین مرداد آیینین عوموموی اعتراض آکسییالارینا قاتیلدیغینا گؤره «ایکی دفعه اعدام» جزاسینا محکوم ائدیلدی. قارداشی وحید افکاری سنگری توپلام ۵۴ ایل، دیگر قارداشی حبیب افکاری سنگری ایسه ۲۷ ایل حبس جزاسینا محکوم ائدیلدی. ۱۳۹۷-جی ایلین مرداد اعتراضلاری، فرقلی شهرلرده‌کی اینسانلارین خوشاگلمز اقتصادی وضعيتینه اعتراض اولاراق باشلادی.
نوید افکاری‌نین وکیلی دونن، ۱۵شهریور۱۳۹۹-جی ایل شنبه گونو، اوچ قارداشین نامعلوم یئره کؤچورولدویونو اعلان ائتدی. سیاسی و اینسان حاقلاری فعالی مهدی محمودیان دا توییترینده یازدی: «افکاری قارداشلاری شیراز حبس‌خاناسیندا آیری آیری بندلرده ساخلانارکن، نوید افکاری، جوما آخشامی آخشام ساعت ۹دا اؤز بندیندن خاریج ائدیلدیکدن سونرا نامعلوم بیر یئره کؤچورولموشدور. دیگر قارداشی وحید افکاری‌نین ده دونندن اعتباراً علاقه‌‌‌سی کسیلیب. عائله و محبوس اوچون بو ناراحاتلیقلارین یارادیلماسی ایشگنجه نومونه‌سیدیر.»
ایندی ایران‌وایرین معلوماتلی منبعیی، نوید افکاری‌نین عیبرت بندینه کؤچورولمه‌سینی اعلان ائدیر و دئییر: «[بو] بندیده هر شئیه اریشیم کسیلیر و اعدام اولاجاقلارین بندیدیر. سیزی اللاها آند وئریرم بو خبری یایین کی بو اوشاغی محرم آییندا اعدام ائتمه‌سینلر.» عادل‌آباد محبوسلاری اؤنجه‌دن ایران‌وایره بیلدیرمیشدیلر کی، اعدام اولونان محکوملار جزالاری‌نین ایجراسیندان ایکی گون اؤنجه عمومیتله یئرآلتی و یا عیبرت بندینه آپاریرلار.
ایران‌وایرین معلوماتلی منبع‌سی دئییر کی، وحید و حبیب افکاری‌نینده «عادل‌آباد حبسخاناسینین ارشاد بندینه» کؤچورولدویونو سؤیله‌دی: «تلفون دانیشیقلاری اون ثانیه اولوب و هئچ بیر محبوسون عائله‌‌‌لری‌نین زیارتینه ایجازه وئریلمه‌دی.
عادل‌آباد محکوملاری اؤنجه ایران‌وایره ارشاد بندی حاقیندا بئله دئمیشدیلر: «ارشاد بندی پراکتیک اولاراق اویغونسوز محبوسلار اوچون بیر جزادیر. اونلاری بیر ایکی هفته ارشاد بندینه سورگون ائدیرلر و بنده گیرر گیرمز ساچلاری دیبدن کسیلیر. ارشاد بندی ایلین ایستی آیلاریندا نم و سویوق اولور و محکومون یورغانی دا یوخدور.»
