نوید افکاری‌نین مزاری داغیدیلدی
نوید افکاری‌نین باجیسی “الهام افکاری” اینستاگرام صفحه‌‌‌سینده شکیللرینی یئر‌لشدیره‌رک قارداشی‌نین مزاری‌نین داغیلدیغینی اعلان ائتدی.
الهام افکاری بو باره‌ده ۲۸ آذر جوما گونو اینستاگرامیندا یازدی: “تهدید ائدین، داغیلدین، حبس ائدین، نویدین آدینی یئر توتوغو اورکلرده نه ائده‌جکسینیز؟”
ایران مئدیاسی ۲۷ خرداد جوما آخشامی گونو نوید افکاری‌نین آتاسی‌نین و قارداشی‌نین فارس ایالتی‌نین سپیدان شهرینده‌کی سنگر کند قبیریستانلیغیندا دفن اولوندوغو یئرده توتولدوقلارینی بیلدیردیلر.
حسین افکاری و اوغلو حمید افکاری، نویدین مزاری‌نین اطرافیندا تمیزلیک ایشلری آپارارکن توتولدو.
معلوماتلی بیر منبع ایران‌وایره بیلدیریب کی، نوید افکاری‌نین عائله‌‌‌سینه قبیریستانلیغا اوزون مدت سربست زیارت ائتمه‌یه ایجازه وئریلمه‌ییب. آنجاق بو گون قبیر داشی اوچون حاضر اولمایان مزارین اطرافینیداکی دیک یاماجی دوزلتمه‌یه چالیشیب و وضعيتی آراشدیرارکن حبس اولوندولار.
نوید افکاری‌نین آتاسی و قارداشی حبسدن بیر نئچه ساعت سونرا سربست بوراخیلدی.
گوونلیک گوجلری افکاری عائله‌‌‌سینه راضی اولدوقلاری تقدیرده نوید افکاری‌نین مزارینا گوونلیک گوجلری‌نین ایسته‌دیکلری قبیر داشی قوراشدیریلیرسا، ۱۰۵ گوندور شیرازین آدئلاباد حبس‌خاناسیندا تجریدده اولان حبیب و وحید افکاری‌نین عومومی بنده کؤچوروله‌جکلری سؤیلندی.
نوید افکاری، ۱۳۹۷-جی ایلین مرداد آییندا کئچیریلن اعتراض آکسییالارینا قاتیلدیغی اوچون توتولاراق اعدام جزاسینا محکوم ائدیلمیش بیر ایرانلی گولشچیسی ایدی.
بو شیرازلی ایدمانچی، وکیللری طرفیندن آچیقلانان بیر چوخ قئیری-موعيّنلییه باخمایاراق و اعدامینا قارشی اولوسلارآراسی کامپانییالارا باخمایاراق عائله‌‌‌سینه خبر وئریلمه‌دن ۲۲ شهریور ۱۳۹۹-جو ایل شنبه گونو اعدام ائدیلدی و دفن ائدیلدی.
