نوستالژی… «دئنه خانُم اجازه، با خواهرم کار دارم»
– خانیم ایجازه بیرونوموز وار؟
معلیمیمیز باشینین ایشاره‌سی‌ایله «گئت» دئدی. کیلاسین قاپیسینا جان آستا- آستا، ادب- أرکانلا گئتدیم. ائله‌کی قاپیدان ائشییه چیخیدیم تو دابانا سالونون او باشینا‌جان قاچدیم. هؤروکلریم مندن قاباق قاچیردیلار. هر هاردان ایدی گرک باجیمدان میداد آلاردیم. کیفیمین بور- بوجاغینی نه قدر قوردالامیشدیم، میدادیمی تاپا بیلمه‌میشدیم.
سوّم کیلاسینین قاپیسینا یئتیشنده، تؤوشه‌ییردیم. کیلاسین قاپیسی آچیق‌ایدی. پایالی قارا تاختانی قاپینین قاباغینا قویموشدولار. تاختا بوتؤولوکله قاپینین قاباغینی توتموشدو. خانیم ریاضی‌نین سسی گلیردی. آذرمیدخت مدرسه‌سینین لاپ اوجا بوی معلیمی‌ایدی خانیم ریاضی. پاچا‌گشاد شالواری قارا تاختانین آلتیندان گؤرونوردو. باشیمی أییب، تاختانین آلتیندان باجیمین کیلاسینا کئچدیم. دینمز- دانیشماز باجیما ساری گئتدیم. هله ده یادیمدادیر. اوچونجو ردیف‌ده کی نیمکت ده اوتورموشدو باجیم. سسیمی قیسیب، آستاجا «میدادیمی تاپا بولمورم. منه میداد وئر» دئدیم. باجیم منه قولاق وئرمیردی. گؤزو قالمیشدی منیم آرخامدا. یئنی‌دن «منه میداد وئر» دئینده، بیر أل قولاغیمدان یاپیشیب بوردو. قولاغیم بتردن اینجیدی هم ده قفیلدن عجیبه بیر ایستی باسدی قولاغیمی. کیلاسین قیزلاری بیردن بیره گولدورلر. منه ائله گلدی کی باجیم دا قیزلارا قاریشیب گولدو. خانیم ریاضی منی قارا تاختانین قاباغینا آپاریب، بم سسی‌ایله امر ائله: «گئت ائشییه، قاپینی دؤی، دئنه خانم اجازه، با خواهرم کار دارم» اگر من اجازه وئرسم، اوندا گئدیب باجیوا هر نه سؤزون وار دئییرسن.
آغلاماغیم توتموشدو. خانیم ریاضی‌دن، قیزلارین هامیسیندان، باجیمدان بئله زهله‌ام گئتدی. آمما اؤره‌ییمده دئدیم: «اونلارین آجیغینا قویمییاجام بیر قطره ده یاش گؤزومدن دامسین.»
قارا تاختانین آلتیندان کریدورا چیخدیم. قولاغیم هله گؤینه‌ییردی. قاپیلارین هر ایکی تایی کیلاسین ایچینه دوغرو آچیلمیشدی. قالدیم هانسی قاپینی دؤیوم. گئنه أییلیب، تاختانین آلتیندان ایچری گئچدیم. بارماغیمی قاوزاییب، دئدیم: «خانیم ایجازه»، قاپیلارین آچیق تایینا اشاره ائله‌دیم. سونرا لال اولدوم. خانیم ریاضی‌نین دئدییی سؤز یادیمدان چیخمیشدی. نه قدر چالیشدیم یادیما دوشمه‌دی. آخیر کی خانیم ریاضی اذن وئردی باجیمین یانینا گئدیب، اوندان میداد ایسته‌دیم. باجیم کیفیندن میدادی چیخاردیب منه وئردی. اؤز پرچمی میدادیم ایدی منه وئرمیشدی. میدادی آلیب، تاختانین آلتیندان کریدورا چیخدیم. اؤز کیلاسیمیزین یئرینه مدرسه‌نین توالتینه ساری قاچدیم. گؤزومون یاشی بورنومون سویونا قاریشمیدی.
رقیه کبیری
