نطنز پارتلاییشیندان ایکی گون سونرا ایران یوزده ۶۰ زنگین‌لشدیرمه‌یه باشلادیغینی اعلان ائتدی
نطنز نووه تاسیساتینداکی پارتلاییشدان ایکی گون سونرا ایسلام جمهوریتی اورانیومو یوزده ۶۰ قدر زنگین‌لشدیرمه‌یه باشلایاجاغینی بیلدیردی.
دانیشیقلاری و برجام بیرگه کمیسیونو اوتورومونو سوردورمک اوچون بو گون وینه گئدن ایران ایسلام جمهورییتی خاریجی ایشلر ناظرلیگی‌نین سیاسی معاوینی «سید عباس عراقچی» بو خبری آچیقلادی.
عباس عراقچی ، زده‌لنمیش ماشینلاری ديَیشدیرمکله یاناشی نطنزده‌کی ماشینلارا یوزده ۵۰ داها چوخ توتوملو ۱۰۰۰ سانتریفیوژون علاوه ائدیله‌جه‌یینی سؤیله‌دی.
یوزده ۶۰ زنگین‌لشدیرمه، ایرانین نووه پروقرامی بویونجا ایزله‌دیگی ان یوکسک فایزدیر.
ایرانا باغلی اولان اینگیلیس دیللی «پرس‌تی‌وی» کانالی ایرانین بو زنگین‌لشدیرمه‌سی‌نین ۲۵ فروردین تاریخینده فعالییته باشلایاجاغینی بیلدیردی.
بوندان اؤنجه، ایرانین سفیری و اولوسلار آراسی اتم انرژیسی آژانسینداکی دایمی نوماینده‌‌سی «کاظم غریب آبادی»، ۲۲ فروردین ۱۴۰۰ بازار گونو نطنز تاسیساتینداکی پارتلاییشدان سونرا نطنزده یئنی نسیل ماشینلارین قوراشدیریلاجاغینی و بیر سیرا باشقا تئکنیکی تدبیرلرین بو هفته ایچینده بیلدیریله‌جه‌یینی آچیقلادی.
کئچن ایل ایسلام جمهوریتی‌نین لیدری علی خامنه‌ای، ایرانین نووه مسئله‌‌سیندن گئری چکیلمه‌یه‌جه‌یینی و حتی یوزده ۶۰ زنگین‌لشدیرمه‌یه گئده‌جه‌یینی سؤیله‌دی.
ایسلام جمهوریتی‌نین قراری ایرانلا برجام آنلاشماسیندا قالان اؤلکه‌لر آراسیندا داوام ائدن دانیشیقلاری داها دا چتین‌لشدیره‌جه‌یی گؤزله‌نیلیر.
iranwire
