نرگس محمدی ایکی آیلیق گؤزآلتی سونراسی قرچک حبس‌خاناسینا کؤچورولوب
اینسان حوقوقلاری ساوونوجولاری درنگی‌نین سؤزچوسو، کئچمیش سیاسی محبوس نرگس محمدی تهرانین اوین حبس‌خاناسیندان ورامینده‌کی قرچک حبس‌خاناسینا کؤچورولوب.
سوسیال مئدیا فعاللاری‌نین بیلدیردیگینه گؤره، خانیم محمدی ایسلام جمهورییتی اطلاعات ناظرلیگینه اؤزل اوین حبس‌خاناسی‌نین ۲۰۹-جو بندینده ایکی آیدان چوخ ساخلاندیقدان سونرا ۲۹ دی ۱۴۰۰-جو ایل چارشنبه گونو قرچک حبس‌خاناسی‌نین ۸-جی سالونونا کؤچورولوب.
بوندان اؤنجه خانیم محمدی‌نین حیات یولداشی تقی رحمانی اونون اوین حبس‌خاناسی‌نین ۲۰۹-جو بندینده تجریدخانادا ساخلاندیغینی بیلدیرمیشدی.
رحمانی آیریجا بیلدیریب کی، ۸ دی-ده حیات یولداشی‌نین ائوینده آختاریش آپاریلیب و گوونلیک ایشچیلری آختاریش زامانی محمدی‌نین بعضی شخصی اشیالارینی، او جومله‌‌‌دن کیتابلارینی موصادیره ائدیبلر.
نرگس محمدی ۲۵ آبان ۱۴۰۰-جو ایلده آبان اعتراضلاری قوربانلاری‌نین ایلدؤنومونده ایشتیراک ائدرکن حبس ائدیلیب و اوین حبس‌خاناسینداکی اطلاعاتین بندی اولان ۲۰۹-جو بنده کؤچورولوب.
سون آیلاردا نرگس محمدی‌یه قارشی آچیلان یئنی پرونده‌ده رژیمه قارشس تبلیغات، حبس‌خانا اوفیسینده آکسییا کئچیرمک، حبس‌خانا یئتکیلیلرینه عصیان و شوشه‌لری سیندیرماق و بؤهتان کیمی اتهاملار ایره‌لی سورولوب.
او، آیریجا “ایران حبس‌خانالاریندا محبوسلارین ایشگنجه و دؤیولمه‌سی باره‌ده دانیشدیغینا گؤره ۸۰ شاللاق، ۳۰ آی حبس و ایکی جریمه اؤدمه جزاسینا محکوم ائدیلیب و حبس‌خانا یئتکیلیلری حبس اولوندوقدان سونرا حؤکملری اونا چاتدیریبلار.
چوخ‌سایلی حبسلر و اوزون حبس جزالاری ایله یاناشی، بو مدنی فعالا اوزون مدت اؤلکه‌دن چیخماق قاداغان ائدیلیب و فرانسادا یاشایان ایکی اؤولادینا باش چکه بیلمه‌ییب.
آیریجا خانیم محمدی حبسده اولدوغو مدتده اونون عائله عضولری و اوشاقلاری ایله تلفون گؤروشونه مداوم اولاراق ایجازه وئریلمه‌ییب.
اولوسلارآراسی اینسان حوقوقلاری تشکیلاتلاری، او جومله‌‌‌دن اولوسلارآراسی عفو تشکیلاتی، نرگس محمدی‌نین صیرف اینسان حوقوقلاری‌نین ساوونولماسی ایستیقامتینده‌کی دینج فعالیتینه گؤره حبس ائدیلدیگینی وورغولایاراق اونون درحال سربست بوراخیلماسینی ایسته‌ییب.
نرگس محمدی بوندان اؤنجه ده ۱۷ مهر ۱۳۹۹-دا ۸ ایل یاریم حبسده قالدیقدان سونرا زنجان حبس‌خاناسیندان سربست بوراخیلمیشدی.
