نتانیاهو ایران ایله آمریکا آراسیندا مومکون آنلاشمایا قارشی اولدوغونو آچیقلاییب
اسرائیلین باش ناظری بنیامین نتانیاهو، بو اؤلکه‌نین ایسلام جمهورییتی ایله آمریکا آراسیندا هر هانسی مومکون آنلاشمایا قارشی اولدوغونو آچیقلاییب.
جناب نتانیاهونون سؤزلرینه گؤره، اسرائیل تهران و واشنگتن آراسیندا ایسته‌نیلن کئچیجی آنلاشماسینا قارشیدیر.
جناب نتانیاهو بازار گونو اسرائیل ناظرلر کابینه‌سینده دئییب کی، اونون حؤکومتی‌نین اؤنملی گؤر‌وی ایرانین نووه پروقرامینا قارشی چیخماقدیر.
او، اسرائیلین برجاما قارشی چیخماسینا توخوناراق، اؤلکه‌سی‌نین آمریکانین بو راضیلاشمایا قاییتماسینی ایسته‌مه‌دیگینی وورغولاییب.
بنیامین نتانیاهو سؤزلرینه بئله داوام ائدیب: بیز ده دئدیک کی، حتی کیچیک و محدود راضیلاشمالار دا بیزیم هدفلریمیزه یاردیم ائتمیر و بیز اونلارا قارشی اولدوغوموزو بیلدیردیک.
ایران عمانین آرا بولوجولوغو ایله آمریکا ایله دولایی دانیشیقلاری تصدیقله‌ییب.
اؤتن هفته آمریکا مئدیاسی باتی و ایران دیپلوماتیک منبع‌لرینه ایستناداً تهران و واشنگتن آراسیندا “نووه گرگینلیگی‌نین آزالدیلماسی” اوچون قئیری-رسمی راضیلاشمانین مومکونلویوندن خبر وئریب.
بو خبرلره گؤره، ایران اورانین زنگین‌لشدیریلمه‌سینی یوزده ۶۰ یوخاری آرتیرمایاجاق و اونون بؤلگه‌ده‌کی دستکله‌دیگی قروپلار آمریکانین سوریه و عراقداکی ماراقلارینا هوجوم ائتمه‌یه‌جک.
بونا اساسلاناراق آمریکا ایرانا قارشی سانکسییالاری گوجلندیرمه‌یه‌جک و ایرانین بلوکلانمیش مالیه قایناقلاری‌نین بیر حیصه‌‌‌سی سربست بوراخیلاجاق.
ایکیلی وطنداشلیغی اولان محبوسلارین آزاد ائدیلمه‌سی ده بو آنلاشمانین ماده‌لریندن بیری اولاجاق.
