مولوی عبدالحمید: بو زهرلنمه‌لر اعتراضلارین یاتیریلماسی‌نین داوامیدیر
بو گون، ۱۲ اسفند زاهیدانین جوما گونلری اعتراض آکسییاسی‌نین داوامی اولاراق، زاهیدان سونیلری‌نین جوما ایمامی مولوی عبدالحمید جوما نمازی خوطبه‌‌‌لرینده اؤیرنجیلرین آردیجیل زهرلنمه‌سینه گؤره دئدی: چوخلاری حِساب ائدیر کی، بو زهرلنمه‌لر اعتراضلارین یاتیریلماسی‌نین داوامیدیر، بو قیزلار مکتبلرده آکسییا کئچیریردیلر، ایندی بیر حرکت اونلاری هدفه آلیب.
عبدالحمید آرتیردی: بو جریانی بیلن و دایاندیرمایانلار اؤلکه‌میزه لاییق دئییللر و هر بیر حالدا بو آخیما سون قویولمالی اولدوغونو وورغولاییب.
زاهیدان جوما ایمامی بیلدیردی: اؤیرنجی قیزلارین زهرلنمه‌سی مسئله‌‌سی بوتون خالقلاردا اجتماعی ناراحاتلیغا سبب اولوب و چوخ جدی مسئله‌‌دیر.
بو سؤزلرله عینی واختدا سیستان و بلوچیستان خبرلرینی یایان “بلوج فعاللاری کامپانییاسی” زاهیدان شهرینده چوخلو سایدا حربی قوه‌لرین مؤوجودلوغونو اعلان ائدیب و دئییب: “باسقیجی حربی قوه‌لر اؤتن جوما گونلرینده اولدوغو کیمی زاهیدان شهرینده ده بؤیوک ایشتیراکا مالیکدیر. زاهیداندان گلن خبرلر گؤستریر کی، بو شهرده اینترنت تامامیله کسیلیب و ایله‌تیشیم زور باش توتور.”
کئچن هفته گوونلیک گوجلری بو شهرده اعتراضلارین یارانماسی‌نین قارشیسینی آلماق اوچون مولوی عبدالحمیدین چیخیشی زامانی اینترنتی کسمیشدی.
