مولوی عبدالحمیدین سسسیز قالان عالیم و روحانیلره قارشی سرت تنقیدی
زاهدانین سونی جوما ایمامی مولوی عبدالحمید هفته‌لیک خوطبه‌‌‌لری‌نین داوامیندا حوزه و روحانیلرین مالی اولاراق حؤکومته باغلی اولدوقلارینی تنقید ائده‌رک دئدی: عالیملرین حؤکومتدن اقتصادی آسیلیلیغی اونلاری توپلومون گئرچکلرینی سؤیله‌مکدن عاجیز ائدیر. جناب عبدالحمید عالیملردن ایسته‌ییب کی، اینسانلارین پروبلئملری قارشیسیندا سوسماسینلار.
مولوی عبدالحمید، زاهیدانداکی جوما نامازیندا ائتدیگی خوطبه‌‌‌ده حوزه‌لرین و دینی مرکزلرین حؤکومتدن باغیمسیز اولماقلارینی ایسته‌ییب و اؤز چیخیشیندا دین خادیملرینه بئله دئییب: حؤکومتلر گلیب-گئدیر، قیامته قدر هئچ بیر رژیم قالمایاجاق، خالقین یانیندا اولمالیسیز.
جناب مولوی عبدالحمید فساد و روشوت حاقیندا دا دئدی: اؤلکه‌نین یولسوزلوق و روشوت معروض قالمایان حیصه‌‌‌سی‌نین آز اولدوغونو و اؤلکه‌نی تالایانلارین چوخ وارلاندیقلارینی، آنجاق عومومی خالقین کاسیب اولدوغونو دئییب و آرتیریب: بعضی عالیملر اوزده اؤزلرینی قورویوبلار آنجاق بانک حسابلاریندا میلیاردلارلا پول وار.
جناب مولوی عبدالحمید، چیخیشی‌نین بیر حیصه‌‌‌سینده خالقین اعتراضلاری‌نین یوخسوللوق و محرومیتدن قایناقلاندیغینی بیلدیره‌رک، بیر داها حؤکومتدن خالقین سؤزونه قولاق آسماسینی ایسته‌ییب، رفراندومون کئچیریلمه‌سینی و خالقین اؤز اراده‌سینی اورتایا قویماق حوقوقونو طلب ائدیب و طالعیینی یازمیش و اینسانلارین زورلا دیندار ائدیله بیلمه‌یه‌جه‌یینی وورغولامیشدیر.
زاهیدانین سونی جوما ایمامی اؤتن ایللرده‌کی اعداملار مسئله‌‌سینه ده توخوناراق، ۶۰-جی ایللرده اوین و گوهردشت حبس‌خانالاری‌نین رئیسی اولموش و حسین مرتضوی زنجانی‌نین آچیقلامالارینی شوک ائدیجی آدلاندیریب و دئییب: تجرید‌خانالاردا باش وئرنلر ایسلاما ضربه وورور و عالیملر بو مؤوضولارا سسسیز قالمامالیدیر.
بو جوما نمازی ایله عینی واختدا یئرلی قایناقلاردان گلن خبرلر جدی گوونلیک موحیطیندن و بو جوما نمازیندا چوخلو سایدا اینسانین ایشتیراکیندان خبر وئریر. سککیز آیدان آرتیقدیر کی، زاهیدان خالقی هر هفته مولوی عبدالحمیدین خوطبه‌لریندن سونرا کوچه‌لره چیخیر و ایسلام جمهورییتینه قارشی شوعارلار سسلندیریر.
