موغان‌دان آیاغی کسیلن جئیران
موغان‌دان آیاغی کسیلن جئیران
رحیم غلامی
داها اؤنجه‌لر مصطفی پایان‌ین اوخودوغو «موغانا جئیران» ماهنی‌سینی گاهدان دینله‌یردیم. همن ماهنی منی موغان‌دا جئیرانین اولوب اولمامادیغی فیکرینه سالمیشدی. آنجاق نئچه دونه ائله گنج چاغلاریمدان بری موغان وادیسینی دولاندیقدان سونرا، گؤزومه هئچ بئله جئیران ساتاشمادی. بو مسئله‌نی یاشلی عشایرلردن سوروشدوغومدا، قاباقجالار موغان‌دا سورو ایله جئیرانین یاشادیغینی دیله گتیرمیشدیلر.
دئمه‌لی «کشت و صنعت پارس» شرکتی قورولمادان اول، موغان شاهسون طایفالاری ایله موغان جئیرانینا عاید گئنیش اوتلاق ایدی. بو شرکتی قورانلار جئیرانلاری اوولاییب، جسدلرینی ایسه ماشین-ماشین داشیمیشدیلار. بو آرادا نئچه جئیران اؤزونو آرازین سویونا ووروب، آذربایجان جمهوریتینه کئچه بیلمیشلر. نئچه سورو ده گرمی خالخال یولو ایله زنگان‌ین زؤهرون دوزونه آخیشیب، اوردا یاشاماغا داوام ائتمیشدیلر. ایندی ایسه زنگان‌ین قره پوشته‌لی بخشینده یئرله‌شن زؤهرون دوزونده (مییانا-خالخال یاخینلیغیندا) ۱۵۰۰ باش موغان جئیرانی یاشاماقدادیر.
باخمایاراق کی اون ایللردیر موغان‌دان جئیرانین آیاغینی کسمیشلر، آمما موغانا جئیران ماهنیسیندا اولدوغو کیمی همی فولکولوروموزدا، همی ده جغرافی آدلاریمیزدا موغان جئیرانی‌نین ایزلرینی آچیق-آیدین گؤرمک مومکوندور. مثلا گئرمی شهرینه یاخین ماراللی داغی و شیروان دره‌ده جئیران گؤلو بو حئیوانلارین همن بؤلگه‌ده یاشامینی آیدینجا اوزه چارپیر.
بوندان باشقا گئییک کلمه‌سی ده مارال آنلامینی داشیییر. عینی حالدا موغان‌دا گئییکلی، بؤیوک بیر طایفانین آدیدیر.بلکه ده همن طایفانین یورد سالیب یایلاق-قیشلاق ائله‌دییی یئرلرده گئیییک و یا موغان جئیرانی‌نین ایزی وار ایمیش.
نئجه‌کی آسلاندوز آدلانان شهرده آسلانین دا اولماسی قطعی‌دیر، چونکی هاردا جئیران-مارال واردیسا، آسلان دا اولا بیلر.هابئله هاردا سیچان اولورسا ایلان دا اولور، هاردا قویون وار قورد دا اولور.
سونوندا عزیز دوستوموز «میلاد بالسینی»دن سون پاراگرافلارلا ایلگیلی علاوه معلومات وئردیکلری اوچون میننتدارلیغیمیزی بیلدیریریک.
