مهندس علیرضا فرشی : بویو بویلانان و سویو سویلانان قهرمان
بیلیرم کی چوخدان دیر بیریسی سیزه بوی بویلاییب، سؤی سؤیله‌ییب، ناغیل دئمه‌ییب! اولسون! داریخمایین! اؤزوم اولمه‌میشم کی! بیری وار ایدی بیری یوخ ایدی، الله-دان سیوای هیچ کیم یوخ ایدی. دده‌سی پارچاچی بززاز، ایکی داداشی، دؤرد باجیسی اولان خالقیمیز کیمی تورکه‌سایاق ساده بیر اوغلان وار ایدی. بالاجا اولسا دا، بو غئیرتلی اوغلان باشینی أکینچیلیگه-ناخیرچیلیغا قاتمیشدی. آنجاق، چاغین ظالیم و فاسید شاهینا قارشی دؤیوشن بیر دؤیوشچو اونلارا سیغینیر. او دؤیوشچونو گیزلتمک سوچونا، اونو بؤیوک داداشی ایله بیرلیکده توتوب، زیندانا سالیرلار. اوچ آی اولمازدان بو بالاجا اوغلانی بوراخسالار دا، گؤزلرینین اؤنونده، سئودیگی داداشینی آسیرلار. بیر داها توتولوب، زیندانا سالینماغی چوخ چکمیر، آنجاق، ایکی ایل چکمزدن، زینداندان قاچماغی باجاریب، گیزلی یاشاماغی باشلاییر: مرند، خوی، سالماس، طئهران، خوراسان و … یول‌لارینا ایز سالیب، یئددی-سککیز ایل ایرواندا، باکی‌دا، …چالیشیب، گوجله‌نیر. نئچه ایل وطن‌دن اوزاق اولسا دا، اؤز میللتینی بوراخیب یادلارا دایانان و میللتین اؤزگورلوگونه قارشی اولان شاها قارشی، تبریزلی‌لرین أیاقلانماغی‌نین دالغالارینی دویونجا، وطنه دؤنوب، دؤیوشچولره قاتیلیر. مین‌لر تبریزلی‌نین قانینا ألی بولانان شاها هامی تسلیم اولسا دا، او آغ بایراق قالدیرماییب، قانی‌نین سون دامجیسی تؤکولمه‌یینجه، تؤکولن قانلارین اؤجونو آلاجاغینا آند ایچیب، بیر داها هامینی دؤیوش مئیدانینا گتیریب، دؤیوشون و دویوشچولرین باشچیسی اولوب، تبریزی قان‌تؤکن تپه‌گؤزون ایشغالیندان قورتاریب، میللت طرفیندن اوجا بیر میللی مقاما أل تاپیر. اونون بو قایرامانلیغی بوتون خالقین قانینی جوشدوروب، آیاقلاندیریب، شاهی اؤلکه خالقی‌نین اؤزگورلوگونو قبول ائتمه‌گه راضیلاشدیریر. شاه اونون گوجوندن قورخوب، یادلارین ألی ایله پول، شؤهرت، مقام، و … ایله اونو آلداتماغا چالیشیر، آنجاق، او: “من پولا-مقاما یوخ، اؤزگورلوک اوچون دؤیوشورم! اؤزگورلوکدن سونرا اؤز أکین-بیچیمیمه باش قاتاجاغام!” دئییر. آنجاق، اونون چئوره‌سینده‌کی‌لرین هامیسی اونون کیمی دگیل ایدی و چوخو پولا-مقاما آلدانیب، توولانیرلار. نئچه آیدان سونرا، یادلارین قوشونونون گلمه‌گینی باهانا ائدیب، بیر داها قان تؤکولمه‌سین دئیه، یادلارا اویان یولداشلاری‌نین اؤیودونه گؤره، تبریزدن چیخیب، طئهرانا گئتمک زوروندا قالیب، آز زامان‌دان سونرا، گوللـه‌له‌نیب، نئچه ایل یاتاغا دوشوب، شهید اولور: دیریلیگینده بیر کیشی تاپیلمادی اونو باشکندینه قایتارسین! اؤلولوگونده ده هله تاپیلماییب!
