مهسا امینی‌نین ایلدؤنومونده تهران‌دا ان آزی ۶۰۰ قادین حبس ائدیلیب
محبوسلارین دورومونو ایزله‌ین کومیته‌نین جوما آخشامی یایدیغی راپورا گؤره، ۲۵ شهریورده مهسا امینی‌نین اؤلومونون ایلدؤنومونده یالنیز تهران‌دا آزی ۶۰۰ قادین حبس ائدیلیب.
بو راپوردا بیلدیریلیر کی، بو سایدا حبسدن ۱۳۰ قادین حاضردا قرچک قادین حبس‌خاناسی‌نین قرنطینه بندینده دوروملاری‌نین بللی اولونماسینی گؤزله‌ییر.
محبوسلارین دورومونو ایزله‌ین ائدن کومیته بو راپوردا بعضی محبوسلارین عائله‌‌‌لرینه ایستناداً یازیر کی، محبوسلارین چوخو پولیس نظارتیندن گیروو قویولاراق آزاد ائدیلیب و حاضردا قرچک حبس‌خاناسیندا اولان قادینلارین دا پرونده‌لری ساوجیلیغا گؤندریلیب و گیروو قارشیلیغندا سربست بوراخیلاجاقلارینا اومید ائدیرلر.
بو راپوردا او، ایران شهرلرینده‌کی حبسلرین آیرینتیلارینی دا وئریب و مثلا، یزد ایالتینده، ابرکوه شهرینده ۲۵ شهریور آخشامی شهرین آنا مئیدانینا توپلاشان ان آزی ۱۲ گنجین ائولرینده گئجه ساعتلاریندا حبس ائدیلیب.
بوندان علاوه، محبوسلارین دورومونو ایزله‌ین کومیته بونونلا باغلی یازیب کی، بو کومیته دهدشت‌ده حبس ائدیلن ۲۰ نفرین آدینی قئیده آلیب. داها اؤنجه کهگیلویه و بویراحمد والیلیگی‌نین سیاسی و گوونلیک معاونی جواد هاشمی مهر خبر آژانسینا بیلدیریب کی، ۲۵ شهریور گئجه‌سی دهدشت‌ده ۱۳ نفری ارکک و ایکیسی قادین اولماقلا ۱۵ نفر حبس ائدیلیب و داها بیر نئچه نفر ده کیملیگی بلیرله‌نیب.
عومومیلیکده، محبوسلارین دورومونو ایزله‌ین کومیته شهریورین ۱۹-دان ۲۹ قدر ۱۱۸ محبوسون آدینی قئیده آلیب.
