مهدی حاجتی حبس و سورگون جزاسینا محکوم ائدیلدی
شیراز شهر شوراسی‌نین کئچمیش عضوو مهدی حاجتی «رژیمه قارشی تبلیغات» اتهامی ایله بیر ایل حبس و ایکی ایل بیرجند ده سورگون جزاسینا محکوم ائدیلدی.
حاجتی بو خبری توییترینده آچیقلادی و گلن هفته باشقا بیر محکمه‌‌یه گئتمه‌سی‌نین لازیم اولدوغونو یازدی.
بو محکمه‌‌ده اونون «یالان یایماق» اتهامینا باخیلاجاق.
حاجتی، کئچن ایل اسفند آییندا کرونا ویروسونون یاییلماسی سببی ایله قومون قرنطینه‌یه آلینمادیغینی تنقید ائتدیکدن سونرا توتوقلاندی و دؤرد گون سونرا گیروو موقابیلینده سربست بوراخیلدی.
حاجتی، ۱۳۹۷-جی ایلین مهرینده ایراندا بهایی وطنداشلارین توتوقلانماسینا اعتراض ائتمیشدی کی بو دا نتیجه‌ده شیراز شهر شوراسینداکی عضولویونون لغو ائدیلمه‌سینه سبب اولدو.
بو تنقیددن سونرا حاجتی بیر ایل حبس جزاسینا محکوم ائدیلدی و ۱۳۹۸-جی ایلین بهمن آیینا قدر حبسده قالدی.
