ملیکا قراگوزلو ۴۰ گوندن سونرا میلیاردلیق گیروولا سربست بیراخیلدی

 شهریورین ایکیسی علامه طباطبایی بیلیم یوردونون ژورنالیستلیک فاکولته‌سی‌نین اؤیرنجیسی ملیکا قراگوزلونون آناسی خانیم اسکندری قیزی‌نین سربست بوراخیلماسی خبرینی آچیقلاییب.

خانیم اسکندری توییترده یازیب کی، قیزی ملیکه بیر میلیارد آلتی یوز میلیون تومن گیروو قارشیلیغیندا آزاد ائدیلیب.

علامه طباطبایی بیلیم یوردونون ژورنالیستلیک فاکولته‌سی‌نین اؤیرنجیسی ملیکا قراگوزلو ۲۲ تیرده مجبوری حجابا اعتراض ائدن ویدئونون یایماسیندان سونرا گوونلیک گوجلری طرفیندن حبس ائدیلیب.

خانیم قراگوزلونون وکیلی محمدعلی کامفیروزی بو وطنداشین حبسینی و حبسده ساخلانماسینی قانونسوز و اینسان حوقوقلاری‌نین پوزولماسی‌نین بارز نومونه‌سی آدلاندیریب و دئمیشدی: خانیم ملیکا قراگوزلونون فیزیکی و روحی دورومو هئچ ده یاخشی دئییل و گؤرونور، اونا آغیر، قوندارما و علاقه‌‌‌سی اولمایان اتهاملار باغلاییبلار. بو وکیلین سؤزلرینه گؤره، خانیم ملیکا قراگوزلو عائله‌‌‌سی‌نین اونون سربست بوراخیلماسی اوچون اوین محکمه‌‌سینه ائتدیگی موراجعتلر ایندییه‌دک سونوجسوز قالیب.

حبسده اولان بو اؤیرنجی آغیر بیر گیروو قویولدوقدان سونرا سربست بوراخیلانا قدر ۴۰ گوندن چوخ مووقتی حبسده قالدی.
#ایران_خبرلری #مجبوری_حجاب #ملیکا_قراگوزلو