ملت وکیلی: ضعیف صینیف آرادان گئدیب، اورتا صینیف داغیلماق اوزره‌دیر
ایسلامی شورا مجلیسین عضوو علی رضایی حؤکومتین اقتصادی سیاستلرینی تنقید ائده‌رک دئییب کی، ایراندا ضعیف صینیف یوخ اولوب و اورتا صینیف داغیلماق اوزره‌دیر.
رضایی ۱۴۰۱-جی ایل بودجه‌سی حاقیندا بئله دئمیشدیر: گئرچکلر خالقا دئییلمه‌لیدیر، بودجه‌نین دارالدیجی و یا اینتیظاملی اولماسی خالقین دردینه درمان ائتمیر، چونکی خالق اؤز اورتیم، چالیشما، گئچینمه‌سی‌نین یاخشیلاشاجاغینی گؤزله‌ییر و خالقین گئچیمینین یاخشیلاشماسینا یاردیم ائتمه‌ین بودجه ۲ گرانا ذیمز.
۱۴۰۱–جی بودجه تلفیق کمیسیونونون عضوو داوام ائتدی: ایستاتیستیکا مرکزی یوخسوللوق حدینی ۱۲ میلیون تومن اولاراق اعلان ائتدی، حال‌بوکی توپلومون بیر چوخ یوخسول صینیف‌لری ۴۵ مین تومنلیک یارانه و گونده‌لیک معاشلار علئله‌لرینی دولاندیریر.
او، دئدی: ایران ضعیف اؤلکه دئییل؛ قیزیلیمیز، نفتیمیز، معدنلریمیز چوخدور، اونا گؤره ده اؤلکه‌نی بئله ایداره ائتمک یانلیشدیر، آما تأسف کی، اؤلکه‌ده فساد، رانت و آیری-سئچکیلیک حؤکم سورور، اوچونجو دونیا توپلوملاری‌نین پروبلئمی ایسه یوخسوللوق و فساددیر، ان اساسی ایسه آیری-سئچکیلیک، قایناق وارسا، هامی اوچون اولمالیدیر. بو قدر پول ایله دستکلمه قوروملاری توپلومون ضعیف صینیفلرینه هانسی خیدمتی گؤستردیکلرینی دئمه‌لیدیرلر؟
بودجه تلفیق کمیسیونونون عضوو قئید ائدیب: توپلومون ضعیف صینیفی یوخ اولوب و ایندی تضییقلر اورتا صینیفین اوزرینده‌دیر و بو صینیف ایفلاسا اوغراماق عرفه‌‌سینده‌دیر؛ یعنی سوسیال سرمایه‌نی ایتیرسک، داها اونو قازانا بیلمریک.
رضایی خبردارلیق ائتدی: اینسانلارین سوموکلرینی سیندیغینی ائشیتمک و اونا دقت ائتمه‌مک دوزگون دئییل. خالقین نیسبی و مینیموم ممنونلوغونو ساغلاماق اوچون خالقین گئچیمی و اورتیمینه دقت یئتیرمه‌لی اولمامیز گرکن حالدا بو ایلین بودجه‌سینده جدی پروبلئملر و بلیرسیزلیکلر وار.
