مرندین یکانات تورپاقلاری‌نین موصادیره‌سینه اعتراض ائدن ۴۳ نفرین دؤیولمه‌سی
مرندین یکانات تورپاقلارینی موصادیره ائده‌رک اونلاری اصفهان شرکتلرینه تحویل وئریلمه‌سینه قارشی چیخان اکینچیلردن ۴۳ نفری ۳۰ اردیبهشت ۱۴۰۲-جی ایلده حبس اولوندوقدان سونر پولیس مامورلاری طرفیندن شدتله دؤیولوب.
مقصود صفری، محبوب صفری، لطف الله باقری، عشقعلی حمزه‌لو، یحیی فقیری، حسین آقا فقیری، هاتف رستمی، قادر خدابخشی، یدالله خدابخشی، محبوب غیبی، محمد محمدزاده، سعید محمدزاده، فاضل سید آقاپور، میثم سید آقاپور، صابر غیبی، محمد علیزاده، وحید جامعی، رضا جامعی، رضا یوسفی، کاظم بهادری، رسول جامعی، افشین جامعی، علی غیبی، میکائیل قاسم‌بگلو، شمس الدین هاشمی، رضا صفری، یعقوب حمزه‌لو، اسکندر جعفری، داماد جامعی، شهرود جعفری، جلیل غنی‌زاده، رامین شاهینی، غلامعباس حمزه‌ای، داماد یوزباشی، سجاد صفری، محمدرضا صفری، احمد صفری، اسکندر قاسم بیگلو، محبوب غیبی، عسگر غیبی، میر عزیز غیبی، هاشم ذاللو و مسعود صفری دؤیولن شخصلرین آدلاریدیر.
قئید ائدک کی، حبس ائدیلنلردن محمد محمدزاده و یعقوب حمزه‌لو آدلی ایکی نفرین دورومونون آغیر اولدوغو آچیقلانیب. حبس اولونانلارین یاخینلاری‌نین وئردیگی بیلگیلره گؤره، پولیس و گوونلیک گوجلری مامورلارین دؤیمه‌سی سونوجوندا یارالانان آدی‌چکیلن شخصلری ساغالانا قدر ساخلایاجاقلار و انونلارین عدلی طبه گئدیب شیکایت عریضه‌سی یازماسینا مانع اولورلار.
بوندان باشقا، بو وطنداشلاردان ۳۰ نفری‌نین پرونده‌سی مرند شهر محکمه‌‌سی‌نین ایکینجی شؤبه‌سینده، قالان حبس اولونانلارین پرونده‌سی ده مرند شهری‌نین اطلاعات ایداره‌سینده‌دیر.
آیریجا، سون گونلر سوسیال شبکلرده اصفهانی شرکتلری طرفیندن تورپاقلاری‌نین ایشغالینا اعتراض اولاراق یئکانات مرند ساکینلری‌نین اعتراضینی یاتیرتماق اوچون چوخلو سایدا پولیس امکداشی‌نین گؤندریلمه‌سینی عکس ائتدیرن ویدئو یاییملانیب.
آلینان خبرلره گؤره، دوغو آذربایجان ایالتی‌نین مرند شهری‌نین یکانات کندی‌نین بیر قروپ ساکینی ۳۰ اردیبهشت شنبه گونو بو شهرین فرمانداریسی قارشیسیندا تورپاقلاری‌نین موصادیره‌سی و اصفهانلی شرکتلرینه وئریلمه‌سینه گؤره اعتراض میتینقی کئچیرمیشدیلر.
