مدنی فعال صالح ملاعباسی ۳ آیلیق حبس جزاسینا محکوم ائدیلیب
قادین، حیات، آزادلیق اعتراضلاری ایله عینی واختدا حبس ائدیلن اهرده یاشایان مدنی فعال “صالح ملاعباسی” ۹۱ گون حبس جزاسینا محکوم ائدیلیب.
ایران‌وایرین الده ائتدیگی خبره گؤره، اهر شهری جزا محکمه‌‌سی‌نین ۱۰۱-جی شؤبه‌سی‌نین باشچیسی امیر خدیوی بو مدنی فعالی توپلومسال دوشونجه‌یی پوزماق مقصدی ایله یالان یایماق اتهامی ایله ۹۱ گون حبس جزاسینا محکوم ائدیب.
صالح ملاعباسی‌نین اتهاملاری اوزره محکمه ۱۹ تیر ۱۴۰۲-جی ایلده کئچیریلدی.
کئچمیش سیاسی محبوس و مدنی فعال صالح ملاعباسی اهرلی‌دیر. او، ۱۴۰۱-جی ایل مهر آیینین ۷-ده بوتون ایراندا حؤکومت قارشیتی اعتراضلارین داوام ائتدیگی بیر واختدا حبس ائدیلمیش و تبریز اطلاعات ایداره‌سی‌نین تجرید‌خاناسینا کؤچورولموشدور. بو تجرید‌خانادا حبسده ساخلانما و قرارسیزلیغا اعتراض اولاراق آجلیق آکسییاسی کئچیریب و نهایت ۱۸ آباندا محکمه‌‌‌یه قدر مووقتی اولاراق گیروو قارشیلیغیندا سربست بوراخیلیب.
صالح ملاعباسی ۱۳۹۴-جو ایلده اعتراض آکسییالاریندا ایشتیراک ائتدیگینه گؤره حبس ائدیلیب و ۱۰ آی مدتینه حبس ائدیلیب.
