مدنی فعال داوود کابالی اورمیه حبس‌خاناسیندا آجلیق اکیسییاسینا باشلاییب
اورمیه‌ده‌کی حؤکومت قارشیتی اعتراضلارلا باغلی محبوسلاردان بیری اولان داوود کابالی اورمیه حبس‌خاناسینداکی دورومونون بلیرسیزلیگی‌نین داوام ائتمه‌سینه و طبی خیدمتلردن ایستیفاده اولونماماسینا اعتراض اولاراق ۵ آذر ۱۴۰۱-جی ایل شنبه گونوندن آجلیق آکسییاسی کئچیریر.
ایران‌وایرین الده ائتدیگی خبرلره گؤره، داوود کابالی یاخینلاری ایله تلفون دانیشیغیندا اورمیه‌ده‌کی حؤکومت قارشیتی اعتراضلارلا باغلی محبوسلاردان بیر سیراسی ایله شنبه گونوندن بری آجلیق آکسییاسینا باشلادیغینی بیلدیریب. او پروستات خسته‌لیگی‌نین آغیرلاشماسی و اورمیه حبس‌خاناسیندا طبی یاردیم گؤستریلمه‌مه‌سی سببیندن داخیلی قاناخما اولوب.
داوود کابالی اورمیه‌ده یاشایان مدنی فعالدیر. او، ۱۴۰۱-جی ایل ۴ آباندان اورمیه‌ده‌کی حؤکومت قارشیتی اعتراضلارلا عینی واختدا حبس ائدیلیب. اونو حبس ائدرکن شخصی گئییملی مامورلار اونا شدتلی سالدیریب و سونوجدا اونون دؤرد بارماغی یئریندن چیخیب، بئل مؤهورلری ده زده‌له‌نیب.
حبسیندن سونرا داوود کابالی اؤنجه اورمیه گوونلیک پولیسی تجرید‌خاناسینا (۹ پیلله) و ۹ آباندا ایسه بو تجرید‌خانادان بو شهرین مرکزی حبس‌خاناسی‌نین گنجلر بؤلمه‌سینه کؤچورولوب.
مهسا امینی‌نین اؤلدورولمه‌سیندن سونرا باشلایان عومومی اعتراضلارین باشلاماسیندان ایکی آیدان چوخ واخت کئچمه‌سینه باخمایاراق، اورمیه شهرینده چوخلو سایدا محبوس هله ده بو شهرین مرکزی حبس‌خاناسی‌نین گنجلر بؤلمه‌سینده حبسده‌دیر. اورمیه‌لی محبوسلارین پرونده‌سی بو شهرین عومومی و اینقیلاب ساوجیلیغی‌نین ۶ و ۱۰ سایلی شؤبه‌لرینه گؤندریلیب. ۶ سایلی شؤبه‌نین موستنطیقی «محب علی‌زاده»، و ۱۰ سایلی شؤبه‌نین موستنطیقی «علی استیری»، بو محبوسلارین عائله‌‌‌لرینی تحقیر ائتمکله یاناشی هله ده بو محبوسلارا گیروو و سربست بوراخیلما قراری وئرمکدن ایمتینا ائدیرلر.
#عومومی_اعتراضلار
