مدنی فعال حمید پورولی تبریز محکمه‌‌سینه چاغیریلیب
تورک مدنی فعال حمید پورولی دونن ۲ اسفند ۱۴۰۲-ده ایران عدليه‌‌سی‌نین الکترون سیستمی (ثنا) واسطه‌‌‌سیله آلدیغی بیلدیریشده «آچیقلاما وئرمک» مقصدی ایله ۵ گون ایچینده وکیل توتماق ایمکانی ایله تبریزین عومومی و اینقیلاب ساوجیلیغی‌نین ۱۵-جی شؤبه‌سینده اولمالیدیر.
بو مدنی فعالین باجیسی آیدا پورولی اؤز اینستاگرام صفحه‌‌‌سینده چاغیریشی یایاراق یازیب: «دونیالیق آنا دیلی گونو ایله بیرگه حمید پورولی، ایران عدلیه سیستمی‌نین الکترون سیستمی (ثنا)واسیطه‌سیله آلینان بیلدیریشه اساسن، بیلدیریشین وئریلدیگی تاریخدن ۵ گون عرضینده ایضاحات آلماق اوچون ۱۵-جی شعبه‌یه چاغیریلیب»
بوندان اؤنجه ۲۵ تیر ۱۴۰۱-جی ایلده اورمیه گؤلونون قصداً قورودولماسینا قارشی راستا کوچه‌ده کئچیریلن اعتراض آکسییالاری ایله عینی واختدا ۷ فعال ایله بیرلیکده گوونلیک گوجلری طرفیندن توتولوب و تبریز حبس‌خاناسینا کؤچورولدوکدن سونرا ۲۸ تیرده تبریز مرکزی حبس‌خانادان مووقتی اولاراق گیروو قارشیلیغندا سربست بوراخیلیب.
آذربایجانلی تانینمیش فعال، مرحوم عزیز پورولی‌نین اوغلو حمید پورولی فعالیتینه گؤره تهدید، چاغیریش، ساخلانما و حبس کئچمیشی وار.
