مدنی بیلیم‌یوردو قاتاریندا اؤیرنجیلری جینس اوزره آییرماق اوچون یئنی چابالار وار
آذربایجانین مدنی بیلیم‌یوردو نون یئتکیلیلری بیلیم‌یوردو اؤیرنجیلرینی داشییان قاتاردا اونلاری جینسلری اوزره آییرماغا چالیشیر.
بو قاتار، اؤیرنجیلری تبریزدن آذرشهره (توفارقان) ساری ۳۵ کیلومتر مسافه‌‌ده یئرلشن بیلیم‌یوردونا داشیماق اوچون ایستیفاده اولونور.
خاطیرلاداق کی، بیلیم‌یوردو اؤیرنجیلری ۱۴۰۱-جی ایلین شهریور آییندا “قادین، یاشام، آزادلیق” حرکاتی ایله باشلامیش کوتلوی اعتراضلار زامانی قاتاردان جینسی آییرما اولمادان ایستیفاده ائتمه‌یه نایل اولوبلار.
لاکین یئتکیلیلر اعتراضلارین آزالماسینی موشاهیده ائده‌رک قاتارین واقونلارینی یئنه قادین و ارککلره اؤزل آییرماغا جهد ائدیر.
بیلدیرک کی، ۴ آبان ۱۴۰۱-ده بیر نئچه ارکک اؤیرنجی تبریزه قاییتماق ایسته‌یرکن جینسی آییرمانی قیرماق مقصدی ایله قادین اؤیرنجیلری عینی واقونا مینمه‌یه دعوت ائدیب.
بو زامان قاتار مامورو موداخیله ائده‌رک سؤیوشلر وئرمه‌یه باشلاییب و قادین اؤیرنجیلردن بیرینی دؤیه‌رک بدن خسارتی آلماسینا سبب اولوب بو واختدان بری قاتارین واقونلاریندا ارکک و قادین اؤیرنجیلر بیرگه سفر ائدیر.
نهایت، ۹ دی ۱۴۰۲-جی ایل شنبه گونو، بیلیم‌یوردونون موحافیظه‌‌‌چیلریندن بیری اؤیرنجیلری بیر داها آییرماغا چابا گؤستریب لاکین اؤیرنجیلرین اعتراضی ایله قاتاری ترک ائدیب.
