محکمه اوتورومو کئچیرمه‌دن یاشار حسن‌پورا قارشی حؤکم چیخاریلیب
تبریز اینقیلاب محکمه‌‌سی‌نین اوچونجو شؤبه‌سی تورک مدنی فعال یاشار حسن‌پورو بیلدیریش ایله محکمه‌یه چاغیراراق اونا قارشی چیخاریلان حؤکمو آلماسینی ایسته‌ییب.
بو چاغیریشدا بیلدیریلیر کی، اونون “اتهامی” ایله باغلی حؤکم چیخاریلیب. آنجاق هله‌لیک اونا قارشی هئچ بیر اتهام ایره‌لی سورولمه‌ییب و محکمه اوتورومو دا اولماییب.
قئید ائدک کی، ۵ شهریور گونو اورمیه گؤلو اوچون چاغیریشیندان سونرا گوونلیک گوجلری کوتلوی اعتراضلاردان قورخاراق بیر چوخ مدنی فعالی هده‌له‌ییب. عینی گونلرده گوونلیک گوجلری جناب یاشار حسن‌پورون ائوینه گئدیب و اونون اشیالارینی داغیدیب، ائوده آختاریش آپاریب و بو تورک مدنی فعالین عائله عضولرینی هده‌له‌ییبلر.
چئوره ساحه‌‌‌سینده اوزمانلارین فیکرینجه، اورمیه گؤلونون قوروماسی بو اراضی‌نین ۱۴ میلیوندان چوخ ساکینی‌نین حیاتینی تهلوکه آلتینا قویوب و بو اراضی ساکینلری‌نین مجبوری کؤچونه سبب اولاجاق. اکولوژی اوزمانلارین فیکرینجه، اورمیه گؤلو اطرافیندا توز و آکتیو دوز فیرتینالاری ۵۰۰ کیلومتره قدر مسافه‌‌نی قت ائده بیلر.
سانال اورتامدا بیر چوخ قوللانیجی اورمیه گؤلونون دیرچلدیلمه‌سی مسئله‌‌سینی تکجه چئوره‌نی قورتارماق اوچون دئییل، هم ده آذربایجان ملتی‌نین اؤلوم-دیریم مسئله‌‌سی اولدوغونو بیلدیریبلر.
سون گونلرده چئوره فعاللارین اعتراضلارینا باخمایاراق، اورمیه گؤلونون مالچلانماسینا باشلانیلمیشدی.
حؤکومت یئتکیلیلری‌نین ادعالارینا گؤره، اورمیه گؤلونون مالچلانماسی بو گؤلون “دوز کوتله‌لرینی ثابت‌لشدیرمک” و دوز فیرتینالاری‌نین قارشیسینی آلماق اوچون حیاتا کئچیریلیب.
