محمود اوجاقلو هله ده وکیلله گؤروشمکدن محرومدور
تورک مدنی فعال محمود اوجاقلو اوین حبس‌خاناسی‌نین ۴-جو بندینده حبسده‌دیر و اونا ۱۶ ایل مدتینه آزادلیقدان محرومئتمه جزاسی و اک جزالار وئریلمه‌سینه باخمایاراق، اونا وکیل ایله گؤروشمه‌سینه ایجازه وئریلمه‌ییب.
محمود اوجاقلو تهران اینقیلاب محکمه‌‌سینده حاکم صلواتی‌نین باشقانلیق ائتدیگی ۱۵-جی شؤبه طرفیندن جینایت تؤرتمک آماجی ایله توپلاشماق و ال بیر اولماق اتهامی ایله ۵ ایل، ایسلام جمهورییتینه قارشی تبلیغ آپارماق اتهامی ایله ۵ ایل، اؤلکه‌نین گوونلیگینی پوزماق اوچون آذربایجان میلی حرکتینه عضو اولماق اتهامی ایله ۱ ایل و اؤلکه‌نین گوونلیگینی پوزماق مقصدی ایله اینسانلاری دؤیوشه و بیر-بیرینی اؤلدورمه‌یه تحریک ائتمک اتهامی ایله ده ۵ ایل و توپلام ۱۶ ایل حبسه محکوم ائدیلیب و هله ده وکیل ایله گؤرشونه ایجازه وئریلمه‌ییب.
جناب اوجاقلو بیر مکتوبدا تهران اینقیلاب محکمه‌‌سی‌نین ۱۵-جی شؤبه‌سی‌نین رئیسیندن اونون پرونده‌سینی اؤیرنمک و ایداره ائتمک اوچون بیر وکیل سئچمیی خواهش ائدیب، آنجاق قاضی صلواتی دئییب بو مومکون دئییل و پرونده‌یه یالنیز عدليه اورقانلاری‌نین وکیللری‌نین داخیل اولماسینا ایجازه وئریلیر.
بو خبری یازانا قدر جناب اوجاقلونون عائله‌‌‌سی و قوهوملاری‌نین وکیل سئچمک اوچون ایشین نؤمره‌سینی اؤیرنمک اوچون دفعه‌‌لرله باش چکمه‌لری ایشین حاکمی‌نین مانع اولماسی سببیندن جاوابسیز قالیب.
پرونده حاکمی جناب صلواتی عائله‌‌‌نین سئچدیگی وکیلین پرونده‌یه باخماسینا مانع اولدو، حال‌بوکی آنایاسا‌نین ۳۵-جی ماده‌‌سینده بوتون محکمه‌‌لرده و ادعاچیلار اوچون وکیل سئچمک حوقوقو وورغولانیر. بو قانونا گؤره، طرفلرین وکیل سئچمک ایمکانی یوخدورسا، اونلارا وکیل تعیین ائتمک واسطه‌‌‌لری ایله تعمین ائتمک لازیمدیر.
محمود اوجاقلو ۲۰ آذر ۱۴۰۱-جی ایل بازار گونو تهرانداکی ایش یئرینده گوونلیک گوجلری طرفیندن حبس ائدیلیب و ناظرلیگی‌نین تجرید‌خاناسینا آپاریلیب و دیندیرمه سورجی باشا چاتدیقدان سونرا اطلاعات ناظرلیگی‌نین ۲۰۹-جو بندی آدی ایله تانینان تجرید‌خانادان اوین حبس‌خاناسینا کؤچورولموشدو.
بوندان اؤنجه محمود اوجاقلو ۱۳۹۳-جو ایلده دونیا آنا دیلی گونو مراسیمی زامانی اتهام اولوناراق گوونلیک گوجلری طرفیندن حبس ائدیلمیشدی.
