ایران‌وایره چاتان خبره گؤره، زنجاندا یاشایان مدنی فعال و تورک اعتراضچی محمد ملکی حبس جزاسی‌نین ایجراسی اوچون زنجانین بیرینجی شؤبه‌سی‌نین ساوجیلیغی طرفیندن چاغیریلیب.

زنجان اینقیلاب محکمه‌‌سی‌نین بیرینجی شؤبه‌سی‌نین ساوجی یاردیمجیسی مجتبی حسینی‌نین وئردیگی بیلدیریشه گؤره، جناب ملکی ۱۶ دی ۱۴۰۲–جی ایل شنبه گونو اؤزونو بو شؤبه‌یه تقدیم ائتمه‌لیدیر.

داها اؤنجه زنجان اینقیلاب محکمه‌‌سی‌نین عزیزالله حیدری‌نین باشچیلیق ائتدیگی ایکینجی شؤبه‌سی محمد ملکی‌نی “رژیمه قارشی تبلیغات آپارماق”  اتهامی ایله ۸ آی، “توپلاشماق و میلی گوونلیگه قارشی ال بیر اولماق” اتهامی ایله ۳ ایل و ۷ آی و “داخیلی گوونلیگی پوزماق مقصدی ایله زنجان محله‌‌‌سی‌نین گنجلر کانالینی یاراتماق و ایداره ائتمک” اتهامی ایله ۶ ایل ۱ گون مدتینه آزادلیقدان محروم ائدیلیب.

ایسلام جینایت قانونونون ۱۳۴-جو ماده‌‌سینه اساساً، بو جزانین ۶ ایل ۱ گونو ایجرا ائدیلیر. محمد ملکی‌یه قارشی چیخاریلان حؤکمون ۵ ایلی ۵ ایل مدتینه شرطی اولاراق قوه‌ده قالاجاق. بو حؤکم پرونده‌ سورجینده وکیلدن محروم ائدیلن بو اعتراضچی وطنداش باره‌سینده چیخاریلیب.

محمد ملکی زنجاندا یاشایان وطنداشدیر. ۲۷ شهریور ۱۴۰۲-جی ایلده قادین، حیات، آزادلیق اعتراضلاری‌نین ایل‌دؤنومو ایله عینی واختدا زنجان اینقیلاب قووشاغیندا اینقیلاب کئشیکچیلری اطلاعاتی‌نین مامورلاری طرفیندن حبس ائدیله‌رک بو قورومون تجرید‌خاناسینا آپاریلدی. محمد ملکی ۱۵ گونلوک تک‌ آداملیق هوجره‌ده قالدیقدان سونرا زنجان حبس‌خاناسینا کؤچورولوب. بو وطنداش ساخلاندیغی مدتده وکیلدن و عائله‌‌‌سینه باش چکمکدن محروم ائدیلیب.