محمدهادی شریفی‌نسب تهران‌دا سیویل پولیسلر طرفیندن دؤیولوب
تورک شاعر و یازیچی محمدهادی شریفی‌نسب (سراسکند اوغلو) تهران‌دا سیویل پولیسلر طرفیندن دؤیولوب و آغیر یارالانیب.
۱۰ شهریور شنبه گونو آخشام، شعر اوخوما مجلیسینی ترک ائتدیکدن سونرا تهرانین اینقیلاب مئیدانیندا محمدهادی شریفی‌نسب هوجوما معروض قالیب و بئش سیویل پولیس اونا هوجوم ائدیب و اونو شدتلی شکیلده دؤیوب.
اؤتن گونلر ایچینده بو تورک مدنی فعال اطلاعات مامورلاری طرفیندن دفعه‌‌لرله تهدید ائدیلیب کی، فعالیتینی داوام ائتدیره‌جیی تقدیرده اونا قارشیلیق وئریله‌جک.
محمدهادی شریفی‌نسب اصلاً سراسکند (هشترود) شهریندن دیر. او سیاسی بیلیملر اؤیرنجیسی، رادیو سونوجوسو و تئاتر اوینچوسودور، و سوسیال شبکه‌لرده “سراسکند اوغلو” لقبی ایله فعالیت گؤستریر.
جناب شریفی‌نسب داها اؤنجه ۱۳ خرداد ۱۴۰۳-ده تهرانین باهاریستان شهرینده‌کی ائوینه گوونلیک گوجلری طرفیندن باسقین ائدیله‌رک توتولوب و اوین زیندانینا کؤچورولموشدو و تخمیناً ۲ هفته‌لیک سورغو-سؤال و ایشگنجه‌دن سونرا بؤیوک تهران حبس‌خاناسینداکی قولدورلارین اولدوغو جینایت بندینه کؤچورولموشدو.
سراسکند اوغلو نهایت ۹ تیر شنبه گونو ۸۰۰ میلیون تومنلیک گیروو قویدوقدان سونرا سربست بوراخیلمیشدی.
ranwire
