مجلیسین و تخصصی کمیسیونلارین باشقانلیق هئیتینده قادینلارین اولماماسینا اعتراض ائدن قادین ملّت وکیللرینه، ایران مجلیسی‌نین 11-جی دؤور باشقانلیق هئیتی طرفیندن وئریلن جاوابی ; “بیر قادین اوشاق ساخلامالی و ائو ایشلرینه باخمالیدیر.”
“بیر قادین اوشاق ساخلامالی و ائو ایشلرینه باخمالیدیر.”
مجلیسین و تخصصی کمیسیونلارین باشقانلیق هئیتینده قادینلارین اولماماسینا اعتراض ائدن قادین ملّت وکیللرینه، ایران مجلیسی‌نین 11-جی دؤور باشقانلیق هئیتی طرفیندن وئریلن جاوابدیر بو
ایران‌وایرین آلدیغی معلوماتلارا گؤره، شهرضا و دهاقان ملّت وکیلی «سمیه محمودی»، افشا ائتدی کی، 11-جی مجلیسین باشقانلیق هئیتی، قادینلارین گؤروینی اوشاق ساخلاماق و ائو باخماق اولاراق بیلیرلر.
بونا گؤره ده، ملّت وکیللری مجلیسین قادین عضولرینه، هم مجلیسین و هم ده تخصصی کمیسیونلارین باشقانلیق هئیتنه قاتیلمایا ایزین وئریلمه‌میش، قانون‌وئریجی اورقانین قادین ایشچیلرینه ده تخصصی کمیسیونلارین کاتیبلیک سیناقینا گیرمه‌لرینه ایزین وئریلمه‌میشدیر.
مجلیسین 13 تخصصی کمیسیونو وار و بو کمیسیونلارین کاتیبلری ملّت وکیللری آراسیندان سئچیلمیر. بلکه، بو وظیفه‌‌‌یه سئچیلنلر مجلیسین ارکک چالیشانلاری آراسیندان سئچیلیرلر.
اون بیرینجی مجلیس بو کمیسیونلارین کاتیبلرینی سئچمک اوچون بیر سیناق کئچیره‌رک مجلیسین بوتون چالیشانلارینا بو کمیسیونلاردا کاتیبلیگینه آدای اولماق شانسی یاراتدی. تخصصی کمیسیونلارین کاتیبلرینی سئچدیکدن سونرا، شهرضانین ملّت وکیلی «سمیه محمودی» مجلیسین قادین چالیشانلاری‌نین بو سیناقا گیرمکدن خاریج ائدیلدیگینی اعلان ائتدی و دئدی: «مجلیسین باشقانلیق هئیتی کمیسیونلارین کاتیبلیگی سويّه‌‌سینده ديَیشیکلیک ائتمک قرارینا گلمیشدی. بونونلا علاقه دار مجلیسین بوتون چالیشانلاریندان کمیسیونلارین کاتیبلیگینه سئچیلمک اوچون حاضیرلانمیش بیر سیناقا قاتیلمایا دعوت ائدیلدی. سیناقا قاتیلماق اوچون بیر سیرا چالیشان باش‌ویردی بو باش‌ویرانلارین تخمیناً 40 نفری قادین ایدی. «آنجاق سیناق زامانی قادینلارین سیناقا گیریشی یاساقلاندی.»
او قادینلارین گیریشلری‌نین یاساقلانماسینی ایضاح ائده‌رک دئدی: «قادینلار اولاراق بو قایدایا اعتراضیمیزی بیلدیردیک و باشقانلیق هئیتی عضولریندن ائشیتدیک کی، اونلارین آرقومئنتی بو ایدی کی، چوخ چتین بیر ایش اولاراق بیلینن کاتیبلیکده قادینلارین اوشاقلاری اولدوغو اوچون ایشله‌یه بیلمزلر. »
سمیه محمودینین فیکرینجه، بو جور ایفاده‌لر عائله قورومونون، کونسولیده ائدیلمه سیاستی ایله چئلیشیر. چونکی بو دوشونجه قادینلارا بئله بیر حیس وئریر کی، بیر قادینین اوشاغی‌نین اولماسی اونو توپلومدان اوازقلاشدیریر و بو دا نتیجه‌ده عائله‌‌‌نین تمه‌لی‌نین ضعیفله‌دیر.
مجلیس باشقانلیق هئیتی‌نین تئبکیسی
مجلیسین باشقانلیق هئیتی‌نین سؤزچوسو «محمّد حسینی فرهنگی»، باشقانلیق هئیتی طرفیندن بو ادعالارا تئبکی وئرن ایلک عضوو اولاراق بو ادعالاری یالانلادی و دئدی کی، «کمیسیونلاردا قادین ملّت وکیللری‌نین اولماماسی ایله باغلی بیر فیکیر بیرلیگی و قارشی دورما یوخدور. حال حاضیردا قادین ملّت وکیللریندن بیری کمیسیوننین سؤزچوسو اولاراق چالیشیر و مجلیسده بئله دوشونجه یوخدور.» باشقا بیر قادینین کمیسیونلارین باشقانلیق هئیتینده اولماماسی‌نین سببی، قادینلارین آدای اولمادیغی و یا دیگر مجلیس عضولری طرفیندن سئچیلمه‌مه‌سی ایدی.”
«روح‌الله متفکر آزاد»، باشقانلیق هئیتی‌نین دیگر عضوو، «مجلیسین باشقانلیق هئیتینده جینسییتچی بیر باخیشین اولمادیغینی سؤیله‌دی.» بو دؤورده، 90-جی اصل کمیسیونینا عضو اولماق اوچون اؤنجه‌کی دؤورلردن فرقلی اولاراق، اوچ قات داها چوخ آدای واردی و مجبور اولاراق بو کمیسیونون عضولرینی سئچمک اوچون باشقانلیق هئیتی قرار وئردی. نهایت، باشقانلیق هئیتی‌نین قراری ایله سککیز نفر سئچیلدی و کمیسیونا قوشولماق ایسته‌ین یگانه قادین آدایا دا سس وئردیک.
تبریز ملّت وکیلی بو حرکتله مجلیسین قادینلاری اؤن پلانا چیخاردیغینی وورغولایاراق دئدی: «باشقانلیق هئیتی قادین و عائله فراکسیونون یارانماسینی تام اولاراق دستکله‌ییر.» بونا گؤره ده مجلیسین قادینا باخیشی سایقی چرچوه‌سینده‌دی و مجلیسین قادینلارا قارشی جینسییتچی باخیشی یوخدور و بیز جینسییت عدالتینی وورغولاییریق. نه محمّد حسین فرهنگی، نه ده روح‌الله متفکر آزاد، شهرضا ملّت وکیلی‌نین، مجلیسین قادین چالیشانلاری‌نین تخصصی کمیسیونلار کاتینلیگی ایچین کئچیریلن سیناقا گیرمه‌لرینه ایزین وئریلمه‌مه‌سی حاقدا ادعاسینا جاواب وئرمه‌دی و بو دا بو ادعانین دوغرو اولدوغونو گؤستریر. کئچمیشده ده ایران مجلیسینده تخصصی کمیسیونلارین کاتیبی ارککلر اولموشدور.
ایستاتیستیکا آچیق حقیقتی گؤستریر؛ مجلیسدیکی قادینلار تاماشاچیدیلار
ایستاتیستیکالار 11-جی مجلیسین 279 عضووندن 17 سینین قادین اولدوغونو گؤستریر. «سمیه محمودی»، «عفت شریعتی»، «زهره الهیان» و «هاجر چنارانی» کیمی بعضی قادین ملّت وکیللری اؤنجه‌کی دؤنملرده مجلیسده اولسالار دا، اونلاردان هئچ بیری ریاست هئیتینه سئچیلمه‌ییب تا کی بو هئیت تامامیله ارککلرین الینده اولسون. بو دا معيّن درجه‌‌‌ده تخصصی کمیسیونلارین دا باشقانلیق هئیتینده باش وئریب و قادین ملّت وکیللرین هئچ بیری تخصصی کمیسیونلارین باشیندا و یا باشقان یاردیمجیلیغیندا یئر آلمیییب.
تخصصی کمیسیونلارداکی باشقانلیق هئیتینده 60 ملّت وکیلیندن یالنیز دؤرد قادین سئکرئتئر و بیری ایسه کمیسیوننین سؤزچوسو دی. زهرا شیخی صحیه کمیسیونینا سؤزچو اولاراق سئچیلدی.
مجلیسین ایداری شؤبه‌سینده، تعیین اولونموش مودورلر آراسیندا هئچ بیر قادین یوخدو . «محمد باقر قالیباف»، طرفیندن سئچیلن بوتون مودورلر ارککلردن اولوشماقدادیر. قالیباف، مجلیس باشقانلیغینا سئچیلدیکدن سونرا ان آزی 10 مودور تعیین ائتمیشدیر کی، بو قانون‌وئریجی اورقاندا قادینلارین پایی صیفیردیر.
قادین فراکسییونو و سوسقونلوق سیاستینی یاراتماق
قادین فراکسیونو هله 11-جی مجلیسین ارکک‌سی سیاستلری ایله باغلی باخیش بیلدیرمه‌ییب، لاکین 16 تیر 1399 تاریخینده باش وئرن باشقانلیق هئیتی‌نین فورمالاشماسی ایله بعضی حرکتلرین اولاجاغینی گؤزله‌ییریک.
بو فراکسیوندا یاپیلان سئچیمه گؤره، قادین فراکسیونون باشینا تهرانین یئنی سئچیلمیش ملّت وکیلی «فاطمه قاسمپور»، سئچیلدی، “فاطمه رحمانی” و “سارا فلاحی” ایسه فراکسیون باشقان یاردیمجیسی و فراکسیون سؤزچوسو اولاراق سئچیلدیلر.
