ماراغا حبس‌خاناسیندا جزا چکن تورک مدنی فعال فعال مختار ابراهیمی‌نین ال‌وئریشسیز فیزیکی دورومونون و ناراحات‌ائدیجی بؤیرک سیمپتوملارینا باخمایاراق، هله ده اونا لازیمی طبی یاردیم گؤستریلمیر.

بو سیاسی محبوسون عائله‌‌‌سینه یاخین بیر قایناق هرانایا دئییب:  “جناب ائبراهیمی ایکی گون اؤنجه‌دن بؤیرکلرینده شدتلی آغریلارلا اوزلشیب، لاکین حبس‌خانا یئتکیلیسی اونون دورومونا اهميت وئرمه‌ییب. آغری‌نین شدتی اونون هوشونو ایتیرمه‌سینه سبب اولوب و خسته‌خانایا کؤچورولدوکدن سونرا یالنیز سرم و آغری‌کسیجی وورولوب. بو گون اونون دورومو یئنیدن پیسلشیب و بو محبوسون سیدیگی قانا قاریشیب، آما حبس‌خانا یئتکیلیلری یئنه ده سورونا آل آتماییبلار. مؤوجود سیمپتوملاری نظره آلساق، طبی سورجین گئجیکمه‌سی بو محبوسون ساغلاملیغینا تهلوکه‌‌‌ یارادا بیلر”.

ماراغا محکمه‌‌سی‌نین بیرینجی شؤبه‌سی‌نین حاکمی اولان حاکم جباری مختار ابراهیمی‌یه “رژیمه قارشی دسته و قروپلاشمالار یاراتماق” و “رژیمه قارشی کانال و قروپلارا عضو اولماق”  اتهامی ایله ۱۰ ایل حبس جزاسی وئرمیشدی کی، وکیل اصغر محمدی‌نین وکالتی ایله حؤکمه اعتراض ائتدیکدن سونرا بو حؤکم بیر ایله آزالدیلمیشدیر.

مختار ابراهیمی بیر ایللیک جزاسینی چکمک اوچون ۲ بهمن ۱۴۰۲-ده ماراغا حبس‌خاناسینا کؤچورولوب.

سیاسی علملر فاکولته‌سی‌نین اؤیرنجیسی اولان جناب ابراهیمی، ۵ شهریورده مراغه‌ده‌کی ایش یئرینده گوونلیک گوجلری طرفیندن توتولدو و ۲۱ گون تجرید‌خانادا قالدیقدان سونرا ۲۶ شهریورده بو شهرین حبس‌خاناسینا کؤچورولدو و سونوجدا گیروو قارشیلیغیندا سربست بوراخیلدی.

بو آذربایجانلی فعال داها اؤنجه‌دا سیویل و دینج فعالیتلرینه گؤره دفعه‌‌لرله توتولوب و حبس اولونوب.