قومدا اؤیرنجیلرین آردیجیل زهرلنمه‌سی‌نین داوامی؛ داها ۱۵ اؤیرنجی خسته‌خانایا یئر‌لشدیریلیب
دونن، چارشنبه گونو، ۳ اسفند قوم اوخوللاریندا ۱۵ اؤیرنجی زهرلنمه سببیندن خسته‌خانایا آپاریلیب. قوم شهرینده سون هفته‌لرده ایکینجی دفعه‌‌دیر کی، اؤیرنجی زهرله‌نیر و اوخوللاردا اؤیرنجیلرین زهرلنمه‌سی‌نین سببی هله ده بللی دئییل.
فارس دؤولت خبر آژانسی‌نین وئردیگی بیلگیلره گؤره، دونن، چارشنبه، ۳ اسفند ۱۴۰۱-جی ایل، قوم شهری‌نین اوچ اوخولوندا ۱۵ اؤیرنجی زهرلنمه سببیله خسته‌خانایا آپاریلیب.
بو بیلگیلره گؤره، بو اؤیرنجیلر حاضردا خسته‌خانادا موشاهیده آلتیندادیرلار، عومومی دوروملاری یاخشیدیر، ایلک موعاینه‌لر آپاریلدیقدان و موعالیجه ائدن حکیملرین تشخیصی ایله یاخین بیر ساعت ایچینده اؤیرنجیلر خسته‌خانادان بوراخیلیبلار.
داها اؤنجه ۲۵ بهمن گونو سحر ساعتلاریندا قومدا بیر قروپ اؤیرنجی عائله‌‌‌سی اؤولادلاری‌نین اوخوللاردا آردیجیل زهرلنمه‌سینه اعتراض اولاراق شهر فرماندارلیغی بیناسی قارشیسیندا اعتراض آکسییاسی کئچیریبلر.
یاییملانان بیلگیلره گؤره، سون اوچ آی ایچینده قوم اوخوللاریندا ان آزی ۳۲۵ اؤیرنجی زهرلنمه علامتلری ایله خسته‌خانایا آپاریلیب و اوخوللاردا اؤیرنجیلرین زهرلنمه‌سی‌نین سببی هله‌لیک بللی دئییل. باشلانغیجدا بو آردیجیل زهرلنمه خبرلرینی شایعه آدلاندیران ائیتیم ناظری بو یاخینلاردا قومدا دورومو ایزله‌مک اوچون تهراندا اؤزل بیر قروپون یارادیلماسینا امر وئریب.
