قزلحصار حبس‌خاناسیندا ان آزی ۲۰ محبوس سیاسی اولمایان اتهاملارلا اعدام ائدیلیب
ایران اینسان حاقلاری تشکیلاتلاری‌نین راپورونا گؤره، کرج‌ده‌کی قزلحصار حبس‌خاناسیندا سیاسی اولمایان اتهاملارلا ان آزی ۲۰ محبوسون اعدام حؤکمو ایجرا ائدیلیب. آنجاق اعدام ائدیلن آلتی محبوسون کیملیگی بللی ائدیلیب. اعدام ائدیلنلر آراسیندا یئددی سونی و اوچ افقان محبوس دا وار.
بعضی قایناقلار ۲۲ محبوسون اعدام ائدیلدیگینی آچیقلاییب. هرانا اینسان حاقلاری سایتی‌نین وئردیگی بیلگیلره گؤره، نارکوتیک جینایتلری ایله باغلی اتهاملارلا اعداما محکوم ائدیلن بو محبوسلاردان آلتیسی‌نین کیملیگی،، «اسماعیل شرفی، محمد غلامی، عبدلله شهنوازی، شهاب ملکی، رسول (سوی آدی بلیرسیز) و (آدی بلیرسیز) قنبری،» تصدیق ائدیلمیشدیر.
اعدام ائدیلنلر آراسیندا یئددی سونی محبوس دا وار. آیریجا، بو محبوسلاردان یئددیسی داها اؤنجه نارکوتیک جینایتلری ایله باغلی اتهاملارلا، دؤرد محبوس قتل اتهامی ایله، اوچ افقان محبوس زورلاما اتهامی ایله و بیر نفر ایسه بلیرسیز اتهاملارلا محکمه اورقانلاری طرفیندن اؤلوم جزاسینا محکوم ائدیلیب.
مدنی و اینسان حاقلاری فعاللاری‌نین اعدام حؤکملری‌نین وئریلمه‌سی و ایجراسینا قارشی داوام ائدن گئنیش تنقیدلرینه و محبوسلارین اعدام سورجینی دایاندیرماق اوچون یئرلی و اولوسلارآراسی طلبلره باخمایاراق، ایسلام جمهورییتی‌نین محکمه سیستمی دایانماق بیلمه‌ین اعدام حؤکملری چیخارماغا داوام ائدیر.
اعدام حؤکملری‌نین گئنیش یاییلماسی و ایجراسی تکجه سیاسی اولمایان سوچلارا محدودلاشمیر. ۱۴۰۱ اعتراض آکسییاسیندان بو یانا اون حبس ائدیلمیش اعتراضچی اعدام ائدیلیب. رضا رسایی‌نین اعدام حؤکمونون ایجراسی دا ۱۶ مرداد گونو باش وئردی.
حوقوق ساوونما تشکیلاتلاری‌نین آچیقلادیغی رسمی ایستاتیستیکایا گؤره، تکجه ۱۴۰۲-جی ایلده آزی ۷۶۷ وطنداش، او جومله‌‌‌دن ۲۱ قادین و ۲ اوشاق سوچلو اعدام ائدیلیب.
