قاچاقمالچی بیر قوروپ اؤلو کؤرپه‌لرین جسدیندن نارکوتیک تیجارتی اوچون ایستیفاده ائدیردی
نارکوتیکلرله موباریزه پولیس ایداره‌سی‌نین رئیسی مجید کریمی، کؤرپه‌لرین جسدینی نارکوتیک قاچاق‌مالچیلیغی اوچون ایستیفاده ائدن بیر قوروپ معين‌لشدیریلدیگینی آچیقلادی.
کریمی علاوه ائدیب کی، قوروپ عضولری «تام بیر وحشیلیکله، اؤلن کؤرپه‌لری تاپیب بدنلرینی بوشالتاراق بدن اورقانلاری عوضینه نارکوتیک ماده یئر‌لشدیریردیلر.»
او علاوه ائدیب، «قادینلار بو کؤرپه‌لری هئچ کیمین گؤرمه‌مه‌سی اوچون قوجاقلارینا آلیردیلار، آما نارکوتیکلرله موباریزه پولیسینده‌کی همکارلاریمین باجاریقلیلیغی ایله بو تاکتیک بوشا چیخدی.»
بو پولیس مامورو علاوه ائتدی کی، نارکوتیک تیجارتی ائدنلر بو ایشده چوخ میقداردا پول اولدوغونا گؤره دینامیک حرکت ائدیرلر و فندلرینی درحال ديیشدیریرلر.
او دئدی «سون زامانلاردا قارشیلاشدیغیمیز پروبلئملردن بیری ده دنیز یولونون نارکوتیک قاچاقمالچیلیق یولونا چئوریلمه‌سیدیر. ایکی مین کیلومتر ساحل خطیمیز وار و نظارت ائتمک چتیندیر.»
«قاچاق‌مالچیلار نارکوتیکلری سرعت گمیلری و قاییقلاری ایله قاچاق ائدیرلر. ایندی بو ساحه‌‌‌دکی گوجوموزو آرتیرماق اوچون دقتیمیزی ساحللرده‌کی اطلاعات بؤلوملرینه وئرمیشیک.»
