قانلی جوما گونونون ایل‌دؤنومو عرفه‌‌سینده سیستان و بلوچیستاندا گوونلیک اورتامی گوجلندیریلیب
۸ مهر ۱۴۰۲-جی ایل زاهیدان خالقی‌نین اعتراضچیلارین قتل عامی‌نین و بو شهرین قانلی جوما‌سی‌نین ایل‌دؤنومودور.
بو آجی گونون ایل‌دؤنومو عرفه‌‌سینده حال‌وش خبر سایتی یول-تیکینتی ماشینلاری‌نین شکیللرینی درج ائده‌رک خبر یاییب کی، ایسلام جمهورییتی‌نین دؤولت قوروملاری زاهیدان اطرافیندا “بندلر و خندکلر یارادیر”.
حال وشین درج ائتدیگی راپورا گؤره، حربی و گوونلیک قورملاری نظارت-بوراخیلیش منطقه‌‌‌لرینی گوجلندیرمکله و قوه‌لرینی آرتیرماقلا زاهیداندا وطنداشلارین حرکتینه نظارت ائتمه‌یه چالیشیر.
سیستان و بلوچیستان ایالتی‌نین اعتراضچیلاری راسک شهری‌نین پولیس کوماندیری طرفیندن یئنی‌یئتمه قیزین زورلانماسی و مهسانین قتلی ایله باغلی خبرلره گؤره، ۸ مهر ۱۴۰۱-ده ایلک اعتراضلاریندان سونرا هر جوما نمازیندان سونرا کوچه‌لره چیخیبلار و اعتراضلاردا چوخ بدل اؤده‌ییبلر.
بلوچ فعاللاری دفعه‌‌لرله وورغولاییبلار کی، ایسلام جمهورییتی زاهیداندا قانلی جوما گونونون ایل‌دؤنومونده کوچه‌لره چیخاجاق اینسانلارلا اوز‌لشمکدن قورخور. زاهیدانین کوچه‌لرینده گرگین گوونلیک اورتامی، نظارت-بوراخیلیش منطقه‌‌‌لری و گوونلیک تدبیرلری‌نین آرتیریلماسی دا بو نظريه‌‌نی تصدیقله‌ییر.
حال‌وشین راپورونا اساساً، زاهیداندا قانلی جوما گونونون ایل‌دؤنومو عرفه‌‌سینده ۵ مهر ۱۴۰۲-جی ایل چارشنبه گونو حربی قوه‌لر و اتومبیل و موتورسیکلت کاروانلاری‌نین قوشقو ایله زاهیدانا کؤچورولمه‌سی آرتیب.
بو قوه‌لر و حربی ماشینلار کیرمان، هرمزگان و گونئی خوراسان ایالتلریندن بلوچیستان شهرلرینه داخیل اولوب و زاهیدان شهرینده رئپرئسباسقیجی قوه‌لرین چوخلوغو دا نظره چارپان شکیلده گؤرونه بیلر.
۸ مهر ۱۴۰۱-ده پولیس مامورلاری زاهیداندا پولیس رئیسی‌نین بلوچ قیزینی زورلاماسینا اعتراض ائدنلری بیرباشا آتشه توتدولار و بو سورجده ۱۰۰ نفره یاخین آدام اؤلدورولدو.
