قالیباف: ایغتیشاشچی‌لار چوخ آدام اؤلدوردو
ایران مجلیسی‌نین باشقانی محمدباقر قالیباف دئییب کی، اؤلکه‌نین سون پروبلئملری، اینسان حاقلارینی ساوونانلار، لاکین اونلار اؤزلری بیر چوخ اینسانین حیاتینا سون قویان ایغتیشاشچیلارین موعلیملریدیر.
محمدباقر قالیباف دونن آخشام ساعتلاریندا شاهچراغ حادثه‌‌‌سی قوربانلاری‌نین آنیم مراسیمینده دوشمنین ایدراک و مئدیا ساواشی یاراتماقلا توپلومون گوونلیگینی آزالتماق ایسته‌دیگینی آچیقلاییب و ادعا ائدیب: یالان دانیشماق و یالان بیلگی یایماقلا، زوراکیلیغی تبلیغ ائتدیکلری اوچون توپلومو قارماشایا سوروکله‌مه‌یه چالیشیرلار.
قالیباف آیریجا بیلدیریب کی، دوشمن ایسلام جمهوریتینی ضعیف و گئریده قالمیش گؤسترمک ایسته‌ییر و آیریجا ادعا ائدیب: آمریکا جمهورباشقانلیغی سئچکیلری زامانی بو اؤلکه رسمی اولاراق داعشین قوروجوسو اولدوغونو بیان ائتدی و ایمکانلاری اولسایدی، بوتون ایسلام اؤلکه‌لرینی محو ائدردیلر، حال‌بوکی دوشمن ایندی ایران میلتینه مئدیا ساواشی آپاریر.
قالیباف اؤلکه‌ده‌کی اقتصادی پروبلئملرین سببلریندن بیرینی اولوسلارآراسی تحریملر آدلاندیریب و دوشمنلرین، ترور و ایغتیشاشلاردان بئزدیگی اوچون تحریملره باش ووردوغونو ادعا ائدیب.
ایراندا سون اعتراضلار زامانی عادی اینسانلارین گئنیش شکیلده ایشتیراکی و آزی ۴۸۰ نفرین اؤلدورولمه‌سی، ۱۸ میندن چوخ اینسانین حبسی توپلومسال ناراضیلیغین بارز تظاهورودور، لاکین یئنه ده ایسلام جمهوریتی‌نین یوکسک روتبه‌لی یئتکیلیلری بیر نئچه دفعه بو اعتراضلارلا باغلی دوشمن و ترورچو ایفاده‌لری ایشله‌دیلیر.
#عومومی_اعتراضلار
