قاراداغ مئشه‌لرینده یانغین باش وئردی
کلیبرین قاسم کندی و بابایلی کندلرینه یاخین اراضیلرده‌کی قاراداغ مئشه‌لرینده یانغین باش وئریب.
محمدباقر هنربر؛ دوغو آذربایجان ایالتی بؤحران ایداره‌ائتمه باش مودیری بونونلا باغلی اولاراق دئدی: حاضردا یانغینا معروض قالان اراضیلرده حربی هلیکوپتر بیرلشمه‌لری و قیزیل آی، ائله‌جه ده یئرلی قوه‌لر وار.
او آرتیردی: سحر یانغینی سؤندورمک اوچون کیرمانشاهدان بؤلگه‌یه بیر یانغین‌سؤندورمه هلیکوپتری ده گؤندریلدی.
هنربر علاوه ائتدی: یانغینا معروض قالان اراضیلرین کئچیلمز و گئنیش اولماسی یانغینین سؤندورولمه‌سینی چتین‌لشدیریب.
او دئدی: بؤلگه‌یه یئر‌لشدیریلن قوه‌لره علاوه اولاراق، ۵ قیزیل آی داغ قورتارما قروپو و تبریزدن سرعتلی یانغینا موداخیله قروپو قورو و هاوا واسطه‌‌‌سی ایله حادثه یئرینه گؤندریلیب.
iranwire
