قاراداغ مئشه‌لرینده یانغین باش وئریب
۵ تیر ۱۴۰۲-جی ایل چارشنبه آخشامی دوغو آذربایجان ایالتی‌نین اهر شهری‌نین “آللی” کندی چئورسینده باش وئرن یانغیندان سونرا بیر نئچه هئکتار قاراداغ مئشه‌سی یانیب.
سوسیال شبکه‌لرده یاییلان گؤرونتولره گؤره، یئرلی اهالی و چئوره فعاللاری هئچ بیر تجهیزات اولمادیغی حالدا یانغینی سؤندورمه‌یه چالیشیرلار. آنجاق بو، یانغینی سؤندورمک اوچون یئتکیلی قوروملاردان هئچ بیری‌نین حادثه یئرینده یوخ ایدی.
قئید ائدک کی، کؤنوللو قوه‌لر بیر چوخ حاللاردا مئشه‌لرده و اوتلاقلاردا باش وئرن یانغینلارین سؤندورولمه‌سینه یاردیم ائدیر، لاکین اونلارین یانغین‌سؤندورمه اوزره حاضرلیغی‌نین اولماماسی مئشه‌لرین و اوتلاقلارین یاندیریلماسیندان قات-قات دهشتلی فلاکتله سونوجلانا بیلر. ۱۳۹۹-جو ایلدن بری کؤنوللو قوه‌لردن ۱۴ نفر ایران مئشه‌لرینده بو ساحه‌‌‌ده لازیمی حاضرلیغین اولماماسی سببیندن یانغینلارین سؤندورولمه‌سی زامانی حیاتینی ایتیریب.
حاضردا قاراداغ مئشه‌لری‌نین ۱۶۴ مین هئکتارا یاخین اراضیسی وار کی، بونون دا ۱۴۸ مین هئکتاری قورونان مئشه‌لر و اؤزل موحافیظه اولونان اراضیلر کیمی قئیدیاتا آلینیب.
قاراداغ یوکسک حئیوان و بیتکی چئشیدلیگینه مالیک بیر خزینه‌دیر. تکجه بو اراضی ایرانین عومومی معلوم بیتکی نؤوعلری‌نین یوزده ۱۵-۲۰ قاپساماقدادیر.
مئشه‌لرین داغیدیلماسی و تهلوکه‌‌‌لی چرکلندیریجی ماده‌‌لرین چئوره‌یه بوراخیلماسی بو بیوسفئر قوروغو اوچون باشقا تهلوکه‌‌‌لردیر. تکجه سونگون میس معدنی آذربایجانین مین هئکتاردان چوخ مئشه‌سینی محو ائدیب.
