فاطمه رجایی راد بابول بیلیم‌یوردوندان قووولوب
بابول طب علملری بیلیم‌یوردونون آکادمیک هئیتی‌نین عضوو و اوزمان جراح دوکتور فاطمه رجایی راد چارشنبه آخشامی، 21 آذرده بو بیلیم‌یوردوندان قطعی شکیلده ایشدن چیخاریلما امری آلدیغینی اعلان ائتدی.
دیشچیلیک اوزره دوکتور اولان و آغیز، اوز-چنه جراحیسی موتخصیصی اولان فاطمه رجایی راد بو ایلین آبان آیینین باشیندا مجبوری حجابسیز آمل شهری‌نین نومونه حکیملری‌نین تلطیف ائدیلمه‌سی مراسیمینده اؤدول آلارکن حجابسیز اولاراق مراسیمه قاتیلمیشدی.
رجایی رادین حجابسیز اولماسینی عکس ائتدیرن ویدئونون یاییملانماسی سوسیال شبکه‌لرده گئنیش سس گتیردی و بو حکیمین جسارتینه چوخلو سایدا ایران وطنداشی‌نین حئیرانلیغی ایله یاناشی، بیر سیرا دؤولت یئتکیلیلری، او جومله‌‌‌دن علی خامنه‌ای‌نین مازندران ایالتینده‌کی نوماینده‌‌سی، آمولون ایمام جوماسی و بیر سیرا دؤولت یئتکیلیلری اونا “شدّتلی قارشیلیق” وئرمه‌یی ایسته‌دی.
فارس خبر آژانسی بو مراسیمدن سونرا یازیب کی، فاطمه رجایی راد آمول ساوجیلیغینا چاغیریلیب و طب علملری بیلیم‌یوردونا داخیل اولماق و درسده ایشتیراک ائتمک حوقوقونا مالیک دئییل.
آیریجا، خانیم رجایی رادین شرفینه کئچیریلن مراسیمده ایشتیراک ائدن بابول شهری‌نین ساغلیق و موعالیجه مودیرلریندن اوچو “فاطمه رجایی رادین حجابسیز اولماسینا تپکی وئرمه‌دیکلرین” گؤره ایشدن چیخاریلیب.
بو تضییقلردن سونرا بعضی حؤکومت مئدیاسی خانیم رجایی رادین “تام حجابا رعایت ائتمه‌مکله ناراحاتلیق یارادان و موقدسلیکلرینی تحقیر ائدنلرین هامیسیندان” “عوذر ایسته‌دیگی” بیر ویدئو یاییملادی.
آمول شهریندن اولان بو نومونه جراحین مجبوری حجاب تاخماقدان ایمتینا ائتدیگینه گؤره عوذر ایسته‌مه‌سی‌نین ویدئوسو حؤکومت مئدیاسی طرفیندن یاییملانیب، حال‌بوکی ایسلام جمهوریینی‌نین گوونلیک و اطلاعات اورقانلاری تنقیدچیلرین و موخالیفلر و اعتراضچیلارین “مجبوری اعترافلارینی درج ائتمک” حاقیندا چوخ‌سایلی قئیدلره مالیکدیر.
فاطمه رجایی راد بابول طب علملری بیلیم‌یوردوندان ایشدن چیخاریلدیغینی اعلان ائتدیکدن سونرا اینستاگرام حکایه‌‌لریندن بیرینده یازیب: “داشقین چای، سرت و کئچیلمز قایالاردان کئچمه‌لی اولسا بئله، یولونو تاپاچاق.”
