علی و رضا واثقی حبس‌خانانین ساغلیق مرکزینده موعالیجه‌‌‌یه آلینیب
دونن، چارشنبه آخشامی، ۱۹ بهمن ۱۴۰۰-ده اردبیل حبس‌خاناسیندا محبوس اولان آذربایجانلی مدنی فعال علی واثقی قارداشی رضا واثقی ایله بیرلیکده حبس‌خانانین ساغلیق مرکزینه کؤچورولمه‌سی باره‌ده یاخینلارینا بیلگی وئریب.
جناب واثقی حبس‌خانانین چئشیدلی بندلرینده اومیکرون ویروسونون سرعتله یاییلماسی و اونون اولدوغو بندده بیر نئچه محبوسونون قرنطینه‌یه کؤچورولمه‌سی باره‌ده بیلگی وئریب.
اردبیل حبس‌خاناسی‌نین ساغلاملیق مرکزینده طبی آوادانلیقلارین اولماماسی طب ایشچیلری‌نین خسته‌لیگین تشخیصی و موعالیجه‌‌‌سینده بیر چوخ پروبلئملرله اوزلشمه‌سینه سبب اولوب کی، بو دا بعضی حاللاردا واختیندا تشخیص قویولماماسی سببیندن محبوسلارین ساغلاملیغینا تهلوکه یارادیر.
بو دوروما باخمایاراق، اردبیل حبس‌خاناسی‌نین یئتکیلیلری محبوسلارین حبس‌خانادان کناردا موعالیجه اوچون مرخصی‌یه گؤندریلمه‌سی‌نین قارشیسینی آلیر.
رضا واثقی و قارداشی علی واثقی، ۱۳۹۹-جو ایل آبان آییندا محکمه مامورلاری طرفیندن توتولدولار و “گئجه بیلدیریشی (شبنامه) چاپ ائتمکله اؤلکه‌نین میلی گوونلیگینه قارشی جینایت تؤرتمک گیریشیمینده گیزلی ال بیر اولماق و رژیمه قارشی تبلیغات آپارماق” اتهامی ایله ایکی ایل حبس جزاسینا محکوم ائدیله‌رک اردبیل مرکزی حبس‌خاناسینا کؤچورولدولر.
