عسل محمدی، فرنگیس مظلوم و هستی امیری اوین حبس‌خاناسیندان سربست بوراخیلیبلار
چارشنبه آخشامی ۱۸ بهمن گونو عسل محمدی، فرنگیس مظلوم و هستی امیری، آدلی اوچ سیاسی محبوس اوین حبس‌خاناسیندان آزاد ائدیلیب.
الده ائدیلن بیلگیلره گؤره، بو محبوسلار چارشنبه آخشامی آخشام عائله‌‌‌لری و دوستلاری‌نین قارشیلانماسی ایله اوین حبس‌خاناسی‌نین قادین شؤبه‌سیندن بوراخیلیبلار.
عسل محمدی اجزاچیلیق فاکولته‌سی‌نین اؤیرنجیسی و امک فعالیدیر، کئچن ایل ۲۰ تیرده بیر ایللیک حبس جزاسینی چکمک اوچون اوین حبس‌خاناسینا کؤچورولموش و جزا مدتی باشا چاتدیقدان سونرا سربست بوراخیلیب.
۵۴ یاشلی سیاسی فعال فرنگیس مظلوم، اوغلو سهیل عربی‌نی آزاد ائتمه‌یه جهد ائتدیگینه و ایسلام جمهورییتینه قارشی چیخدیغینا گؤره توتولوب و حبسه محکوم ائدیلیب. آیریجا خانیم مظلوم علی خامنه‌ای‌نین ایستعفا آچیقلاماسینی ایمضالایان ۱۴ نفردن بیریدیر.
دونن آزادلیغا چیخان باشقا محبوس هستی امیری ایسه اقتصادی حوقوق فاکولته‌سی‌نین اؤیرنجیسیدیر و اولوسلارآراسی قادینلار گونو مراسیمینده ایشتیراک ائتدیگینه و یاشاماق حوقوقونو ساووندوغونا و اعدام حؤکمونه قارشی چیخدیغینا گؤره حبس جزاسینا محکوم ائدیلیب.
بو محبوسلارین سربست بوراخیلماسی ایسلام اینقیلابی‌نین ایلدؤنومو موناسیبتیله محبوسلاردان بعضیلرینه عفو اعلان ائدیلمه‌سی ایله عینی واختا تصادوف ائدیب. عدليه‌‌نین سؤزچوسو بو عفوه اعتراضلار زامانی حبس ائدیلن ۷۰ مین اعتراضچی‌نین داخیل اولدوغونو آچیقلامیشدی.
