عباس لسانی سورگون اوچون یزد شهرینه کؤچورولوب
تورک فعال عباس لسانی ۱۱ شهریور ۱۴۰۳-ده گونورتادان سونرا عائله‌‌‌سی ایله ایله‌تیشیم زامانی یزد شهرینه کؤچدویونو بیلدیریب.
جناب لسانی یزد شهرینه کؤچورولدوکدن سونرا گوونلیک گوجلری طرفیندن یزد شهری‌نین اطلاعات ایداره‌سینه آپاریلیب.
جناب لسانی‌یه مجبوری یاشاییش جزاسی‌نین مدتینی یزدده کئچیرمه‌لی اولدوغو بیلدیریلیب و دئییلیب کی، عکس حالدا اونون جزاسی آغیرلاشدیراجاق.
عباس لسانی گوونلیک گوجلرینه بیلدیریب کی، مومکونسه، هئچ بیر قدار حؤکمه تابع اولمارام.
عائله‌‌‌سی‌نین بیلدیردیگینه گؤره، او، یزد شهر اطلاعات ایداره‌سی‌نین مرکزی قرارگاهینی ترک ائتدیکدن سونرا ائوه قاییتماق اوچون درحال یولجو تئرمینالینا گئدیب.
۱۰ شهریور ۱۴۰۳-جو ایلده شخصی ائوینده حبس اولوناراق یزد شهرینه کؤچورولن عباس لسانی یزد شهرینده ۲ ایللیک مجبوری قالما امرینه عمل ائتمه‌یه‌جه‌یینی و اردبیل شهرینه قاییداجاغینی بیلدیریب.
داها اؤنجه ۱۲ مهر ۱۴۰۲-ده اردبیل ایالتی‌نین تئمییز محکمه‌‌سی‌نین ۱-جی شؤبه‌سی بو محبوسون حؤکمونو یئرینه یئتیریلمه‌مه‌سی ایله باغلی محکمه‌‌‌نین الکترون سیستمی واسطه‌‌‌سیله وئردیگی بیلدیریشده بو تانینمیش تورک فعالین ۲ ایللیک سورگون جزاسینی اوچده بیر آرتیردیغنی بیلپدیریب.
عباس لسانی دؤرد ایل ایکی آیلیق حبسدن سونرا ۲ اسفند ۱۴۰۱-ده اردبیل زیندانیندان آزاد ائدیلدی. او سربست بوراخیلدیقدان درحال سونرا عدليه ایشچیلری اونو حبس ائده‌رک ایکی ایل مجبوری سورگون اوچون یزد شهرینه کؤچوردولر.
بونا باخمایاراق، عباس لسانی سورگون قرارینا عمل ائتمه‌یه‌جه‌یینی بیلدیره‌رک عینی گون یزددن اردبیله قاییتدی.
عباس لسانی اردبیللی شاعر، یازیچی و مدنی فعالدیر. سون ۲۰ ایلده فعالیتینه گؤره دفعه‌‌لرله حبس ائدیلیب و سورگونه محکوم ائدیلیب. اونون «اؤزگورلوک هارایی» آدلی کیتابی دا وار. بو کیتابدا جناب لسا‌نی‌نین مقاله‌لر، چیخیشلار، شعرلر، موصاحیبه‌لر و حبس‌خانادان گؤندردیگی مکتوبلار توپلانیب.
