عالی محکمه‌‌ده محمود اوجاقلونون پرونده‌سینه یئنیدن باخیلماسی باره‌ده ایستک رد ائدیلیب
۲۰ آیلیق حبسدن سونرا هله ده اوین حبس‌خاناسی‌نین ۴-جو بندینده مرخصی‌سی اولمادان ساخلانیلان تورک مدنی فعال محمود اوجاقلونون محکمهسینین یئنیدن آراشدیریلماسی ایله باغلی ایستک ایرانین عالی محکمهسینین ۳۹-جو شؤبه‌سینده رد ائدیلیب.
محمود اوجاقلو تهران اینقیلاب محکمه‌‌سینده حاکم صلواتی‌نین باشقانلیق ائتدیگی ۱۵-جی شؤبه طرفیندن جینایت تؤرتمک آماجی ایله توپلاشماق و ال بیر اولماق اتهامی ایله ۵ ایل، ایسلام جمهورییتینه قارشی تبلیغ آپارماق اتهامی ایله ۵ ایل، اؤلکه‌نین گوونلیگینی پوزماق اوچون آذربایجان میلی حرکتینه عضو اولماق اتهامی ایله ۱ ایل و اؤلکه‌نین گوونلیگینی پوزماق مقصدی ایله اینسانلاری دؤیوشه و بیر-بیرینی اؤلدورمه‌یه تحریک ائتمک اتهامی ایله ده ۵ ایل و توپلام ۱۶ ایل حبسه محکوم ائدیلیب.
اک جزا اولاراق جناب اوجاقلویا ۲ ایل مدتینه سیاسی پارتییا، قروپ و تشکیلاتلارا عضو اولماق، سانال اورتام، مئدیا و مطبوعاتدا ایشله‌مک، اؤلکه‌دن چیخماق قاداغاسی و بوتون سوسیال شبکه‌لردن عضولویونو سیلمک حؤکمو آلیب.
محمود اوجاقلو ۲۰ آذر ۱۴۰۱-جی ایل بازار گونو تهرانداکی ایش یئرینده گوونلیک گوجلری طرفیندن حبس ائدیلیب و اطلاعات ناظرلیگی‌نین تجرید‌خاناسینا آپاریلیب و دیندیرمه سورجی باشا چاتدیقدان سونرا اطلاعات ناظرلیگی‌نین ۲۰۹-جو بندی آدی ایله تانینان تجرید‌خانادان اوین حبس‌خاناسینا کؤچورولموشدو.
بوندان اؤنجه محمود اوجاقلو ۱۳۹۳-جو ایلده دونیا آنا دیلی گونو مراسیمی زامانی اتهام اولوناراق گوونلیک گوجلری طرفیندن حبس ائدیلمیشدی.
