عالیه مطلب‌زاده و نرگس محمدی اطلاعات ناظیرلیگی قوه‌لرینین هوجومو ایله حبس ائدیلیبلر
مرخصی‌ده اولان ایکی سیاسی محبوس نرگس محمدی و عالیه مطلب‌زاده گوونلیک گوجلری طرفیندن خانیم محمدی‌نین ائوینه باسقین ائدیله‌رک حبس‌خانایا گؤندریلیب.
وئریلن بیلگیلره گؤره، نرگس محمدی دونن حبس‌خانایا قاییداجاغینی بیلدیرسه ده، گوونلیک گوجلری اونون ائوینه گیره‌رک اونو حبس ائدیبلر.
نرگس محمدی‌نین حیات یولداشی تقی رحمانی یازیب کی، اطلاعات ناظرلیگی‌نین ۷ مامورو نرگس محمدی و عالیه مطلب‌زاده‌نی حبس ائتمک اوچون نرگس محمدی‌نین ائوینه باسقین ائدیب.
خانیم محمدی دونن اؤز اینستاگرام صفحه‌‌‌سینده گیروو پولونو اله کئچیرمکله تهدید ائدیلدیگی اوچون حبس‌خانایا قاییداجاغینی یازیب.
نرگس محمدی کیمی مرخصی‌ده اولان فوتوقرافچی و قادین حوقوقلاری ساوونوجوسو عالیه مطلب‌زاده ده توتولوب و خانیم محمدی ایله بیرلیکده وارامینده‌کی قرچک حبس‌خاناسینا کؤچورولوب.
نرگس محمدی اؤنجه‌لر سون اعتراضلارین قوربانلاریندان بیری‌نین ایلدؤنومونده حبس ائدیلیب و ۸ ایلدن آرتیق حبس جزاسینا محکوم ائدیلیب.
ایران مطبوعات آژادلیغی بیرلیگی‌نین باشقان یاردیمجیسی و بیر میلیون ایمضا کامپانییاسی‌نین عضوو عالیه مطلب‌زاده ۱۳۹۶-جی ایلده اینقیلاب محکمه‌‌سی طرفیندن “میلی گوونلیگه قارشی توپلاشماق و ال بیر اولماق و رژیمه قارشی تبلیغات” اتهامی ایله اوچ ایل حبسه محکوم ائدیلیب.
#ایران_خبرلری #سیاسی_محبوسلار
