طب باجیسی تشکیلاتی: هر آی ۱۰۰ طب باجیسی کؤچ ائدیر
طب باجیلاری تشکیلاتی‌نین باش مودیری “محمد میرزابیگی” دئییر کی، هر آی بو آلاندا اورتالاما ۱۰۰ نفر کؤچ ائدیر.
ایرانداکی مئدیانین وئردیگی خبرلره گؤره، طب باجیلاری تشکیلاتی‌نین رئیسی ۱۴۰۰-جو ایل ۱۸ فروردین، چارشنبه گونو بو خبری آچیقلادی و دئدی: باشقا اؤلکلرده مین نفره ان آز دؤرد-سککیز طب باجیسی وار، آما ایراندا هر مین خسته اوچون بیر طب باجیسیندان داها آز جالیشان وار.
میرزابیگی، دیگر اؤلکلرین ایران طب باجیلارینی خوش قارشیلادیقلارینی دا سؤیله‌دی.
او کرونا اپیدمیسیدن بری ۱۴ آی ایچینده ۸۰ مین طب باجیسی‌نین ویروسا یولوخدوغونو و ۱۱۰ نفرین اؤلدویونو ایضاح ائتدی.
طب باجیلاری تشکیلاتی‌نین باش مودیری‌نین وئردیگی ایستاتیستیکایا گؤره، سون بیر ایلده خسته‌خانایا یئر‌لشدیرمه، قرنطینه و علاقه دار مسئله‌‌لر سببیندن تخمیناً ۸ مین طب باجیسی ایشدن چیخاریلارکن، ایش ایجازه‌سی بهانه‌سی ایله بیر ایل ایچینده ایشه قبول ائدیلنلر سککیز میندن آز ایدی.
طب باجیسی تشکیلاتینا گؤره، کلینیک‌ده ۱۴۰ مین طب باجیسی، طب باجیسی فاکولته‌لرینده ۶۰ مین لیسانس اؤیرنجیسیندن دوکتورا اؤیرنجیسینه قدر، عینی زاماندا ائوده قوللوق سئکتوروندا ۳۰ مین طب باجیسی توپلوما دؤنوک اولاراق چالیشیرلار.
بوندان اؤنجه، ۳۰ آذر ۱۳۹۹-دا تهران شهر شوراسی‌نین سؤزچوسو “علی اعطا” ایراندا کؤچ تصدیق‌نامه‌سی طلب ائدن طب باجیلاری‌نین سایی‌نین آرتماسی‌نین سببلری‌نین “ماليه موباحیثه‌لری” و “معاشلاری‌نین واختیندا اؤده‌نیلمه‌مه‌سی” اولدوغونو بیلدیره‌رک دئمیشدی: مسووللاردان بیری‌نین وئردیگی رسمی ایستاتیستیکایا گؤره، طب باجیلاری آراسیندا کؤچ اوچون تصدیق‌نامه طلبی اوچ قات آرتیب. بو رسمی ایستاتیستیکادیر و بو تصدیق‌نامه ایستیی‌نین اون قات آرتدیغینی گؤستریر.”
iranwire
