طبس معدنینده بوتون قاپالی قالانلارین اؤلوملری چیخاریلمادان اؤنجه اعلان ائدیلیب
گونئی خوراسان بؤحران ایداره‌ائتمه ایداره‌سی‌نین باش مودیری محمدعلی آخوندی، طبس معدنینده قاپالی قالان بوتون معدنچیلرین اؤلدویونو آچیقلاییب. بونونلا دا بو معدن قضاسیندا اؤلنلرین سایی ۴۹ نفره چاتیر.
گونئی خوراسان بؤحران ایداره‌ائتمه ایداره‌سی‌نین باش مودیری محمدعلی آخوندی، طبس معدنینده قاپالی قالان بوتون معدنچیلرین اؤلدویونو آچیقلاییب. بونونلا دا بو معدن قضاسیندا اؤلنلرین سایی ۴۹ نفره چاتیر.
آخوندی چارشنبه آخشامی، ۳ مهرده قورتاریجیلارین جسدلری چیخارماق چابالاری‌نین سون دورومو ایله باغلی بیلدیریب کی، ۱۰ جسد هله ده معدن‌ده قاپالی دورومدادیر.
او، آرتیریب کی، قورتاریجی قوه‌لر معدنین چؤکمه‌سی احتیمالی اولان یئرلرده اولدوقلارینی، قضا باش وئرمسه، چارشنبه آخشامی آخشاما قدر بوتون جسدلرین معدندن چیخاریلاجاغینی آچیقلاییب.
۳۱ شهریور شنبه گونو آخشام ساعتلاریندا مئدیا “کؤمور معدنی” شرکتی‌نین بیرینده “گاز سیزماسی” سببیندن پارتلاییش باش وئردیگینی آچیقلاییب.
گونئی خوراسان بؤحران ایداره‌ائتمه ایداره‌سی‌نین باش مودیری چارشنبه آخشامی بیلدیریب کی، قضا زامانی معدن شرکتی‌نین ایشچیلری‌نین عومومی سایی ۶۵ نفر اولوب.
داها اؤنجه بیلدیریلیب کی، پارتلاییش زامانی سی و بی بلوکوندا ۶۹ ایشچی ایشله‌ییردی.
چارشنبه آخشامی طبس معدنینده قاپالی قالان ۱۰ ایشچی‌نین جسدی‌نین تاپیلماسی اوچون آپاریلان قورتارما عملیاتی اوچونجو گونونه چاتیب.
عینی زاماندا، آمریکا سفرینده بیرلشمیش ملتلر تشکیلاتی‌نین باش کاتیبی ایله گؤروشن مسعود پزشکیان حادثه‌‌‌نین سببینی ایسلام جمهورییتینه قارشی سانکسییالار و آوادانلیقلارین ایرانا گیریشینه قاداغا قویولماسی اولاراق بیلدیریب.
لاکین اؤلن ایشچیلرین عائله‌‌‌سی‌نین و بیر سیرا یئتکیلیلرین و ملت وکیللری‌نین بیلدیردیگینه گؤره، بو قضایا سبب معدن یئتکیلیلری‌نین گاز سیزماسی خبردارلیغی و گوونلیک سیستمینه دقتسیز یاناشمالاری اولوب.
