طاهره بجروانی ۱۸ آی حبسه محکوم ائدیلیب
۱۳۹۸-جی ایلین آبان اعتراضلاری قوربانی اولان علی فتوحی کوهساره‌نین حیات یولداشی و اوین حبس‌خاناسیندا ساخلانیلان طاهره بجروانی، شهریار اینقیلاب محکمه‌‌سی‌نین حاکمی اسماعیل برجسته طرفیندن ۱۸ آی حبسه محکوم ائدیلیب.
طاهره بجروانی‌‌نین اتهامی رهبری تحقیر ائتمک آدلانیر و اونا قارشی ایره‌لی سورولن اتهامی ثبوت ائتمک اوچون محکمه‌‌یه هئچ بیر سند وئریلمه‌ییب.
خانیم بجروانی بو عومومی عفو آدلاندیران سون سربست بوراخیلمالاردا گیروو قارشیلیغندا ویا مووقتی آزادلیغا بوراخیلما ایمکانی تاپماییب.
بوندان اؤنجه طاهره بجروانی حیات یولداشی‌نین آد گونو ایله عینی واختدا ۹۸-جی ایلین آبان اعتراضلاری‌نین قوربانلاریندان بیری اولان علی فتوحی‌‌دن بیر کلیپ یئر‌لشدیره‌رک یاد ائدیب و یازیب: حیات یولداشیمی گولـله ایله اؤلدورمسیدیلر، بو گون اونون ۴۰ یاشینی بیرلیکده قئید ائده‌جکدیک. آنجاق تأسف کی، بیزیم بو اؤلکه‌دن پاییمیز گولوش، شنلیک دئییل، قان، گؤز یاشی، درد ایدی. آد گونون موبارک قهرمان…
خانیم بجروانی ۳۰ آذر ۱۴۰۱-جی ایل سحری شهر قودسده (حسن خان قالاسی) ایش یئرینده گوونلیک گوجلری طرفیندن حبس ائدیلیب.
